Հայաստանը հնագույն քաղաքակրթությունների ֆորումում

Լեռնային Ղարաբաղում հայկական պատմամշակութային ժառանգության հուշարձանների միտումնավոր ոչնչացման և ինքնությունը փոխելու քաղաքականությունը Թեհրանում ներկայացրել է Հայաստանի արտաքին գործերի փոխնախարար Վահե Գևորգյանը։ ՀՀ արտաքին գործերի նախարարության փոխանցմամբ՝ Գեւորգյանը դեկտեմբերի 21-ին Թեհրանում մասնակցել է Հնագույն քաղաքակրթությունների ֆորումի 7-րդ նախարարական հանդիպմանը։

2017 թվականի ապրիլի Աթենքում տեղի ունեցավ «Հնագույն քաղաքակրթությունների առաջին ֆորումը», նախարարական համաժողովը, որին մասնակցում էին 10 երկրներ՝ Հունաստան, Չինաստան, Եգիպտոս, Բոլիվիա, Հնդկաստան, Իրաք, Իրան, Իտալիա, Մեքսիկա և Պերու։

Ֆորումին մասնակցող տասը երկրները ներկայացնում էին հիմնական հնագույն քաղաքակրթությունները՝ եգիպտական, հռոմեական, պարսկական, չինական, հունական, մայաների, ինկերի, ացտեկների, միջագետքի և Ինդուսի հովտի քաղաքակրթությունները:

Առաջին ֆորումը կազմակերպվել է Հունաստանի ԱԳ նախարար Նիկոս Կոտզիասի նախաձեռնությամբ և չինացի գործընկեր Վան Յիի աջակցությամբ, ինչպես նշեց հույն նախարարը, պատմական մեծ մշակույթ ունեցող պետությունների հանդիպումն այսօր արդիական է և ազդում մարդկության վրա՝ հանդիսանալով փափուկ և տնտեսական ուժի մի ձև։

Հայաստանը Հնագույն քաղաքակրթությունների ֆորումի լիիրավ անդամ է դարձել 2018 թվականի հուլիսին։ Իրենց համաձայնությունը տվել են ֆորումի անդամ 8 երկրներ։