Ինչպես կարդալ գորգը. Շուշիի գորգի թանգարանի տնօրեն
- 14:18 24.12.2023
Օրերս Հայ-եվրոպական համալսարանում տեղի ունեցավ «Ինչպես կարդալ գորգը» թեմայով դասախոսություն, որը կարդաց Շուշիի գորգի թանգարանի հիմնադիր և տնօրեն, իրավաբան, տնտեսագետ, միջազգային իրավունքի մասնագետ, արվեստագետ, ձեռնարկատեր, գորգերի հավաքածու հեղինակ, Արցախյան երեք պատերազմների մասնակից Վարդան Ասծատրյանը։
«Գորգ կարդալը բավականին հետաքրքիր գործունեություն է, յուրաքանչյուր գորգ ունի իր թեմատիկան և գունային սխեման: Նրանց գույները տարբեր են՝ հայկական գորգերի մեջ գերակշռում են կարմիր գույները։ Գույները ստացվում են բնական ներկանյութերից։ Գորգն ունի իր սկիզբն ու վերջը՝ թե՛ տեխնիկապես, թե՛ ստեղծագործական առումով, ջուլհակի համար գորգ ստեղծելիս ամենակարևորը թեմատիկ դինամիկան հասկանալն ու հաշվի առնելն է, օրինակ՝ արևագորգը անձնավորում է օրվա արևային դինամիկան։
Գորգագործության արվեստում հիմնականում 4 թեմա կա՝ աստվածաշնչյան, դիցաբանական, բնության երևույթներ, շրջապատող աշխարհ, և յուրաքանչյուր գորգի նախշ մի երեւույթի անձնավորումն է։ Գորգը կարելի է կարդալ վերևից ներքև կամ չորս կողմից։ Ընդունված է չորս կողմից կարդալ աստվածաշնչյան թեմաներով գորգեր, որոնք վերջ չունեն։
Կցանկանայի, որ գորգագործության արվեստը ուսումնասիրվեր Հայաստանի դպրոցներում և բուհերում։ Այս արվեստին տիրապետող մարդը հեշտությամբ կարող է տիրապետել ցանկացած մասնագիտության»,- Step1.am-ի հետ զրույցում ասաց Վարդան Ասծատրյանը։
Արսեն Աղաջանյան