Անհողները պատերազմում են խաչքարերի դեմ
- 17:25 08.01.2024
Արցախում իրականացված ցեղասպանական գործողություններից, էթնիկ զտումներից` տարածքը բնիկ հայերից մաքրելուց հետո, Ադրբեջանը պատերազմ է հայտարարել հայկական արժեքներին, ահազանգում է Artsakh Monuments https://www.facebook.com/artsakh.monuments էջը, ներկայացնելով լուսանկարներ ու տվյալներ ավերված խաչքարերի վերաբերյալ։
Ըստ համացանցում հայտնված լուսանկարների ու տեսանյութերի պարզվում է, որ ադրբեջանցիները ավերել են Աղանուսի Թթու ջուր տարածքում /Քաշաթաղ/, Վաղուհաս գյուղի /Մարտակերտ/ ճամփեզրին կանգնեցված խաչքարերը, որոնք նվիրված էին Տիգրան Աբրահամյանի ու ընկերների, ինչպես նաև Մխիթար Աղաբեկյանի հիշատակին, ովքեր իրենց կյանքն էին զոհաբերել վասն հայրենյաց։
Վանդալիզմի ադրբեջանական դրսևորմանը հանդիպում ենք նաև Մարտակերտ քաղաքում, որտեղ ավերվել է Դանիել Վարուժանի փողոցում գտնվող Հարութ Բաբայանի և Գարիկ Մնացականյանի հիշատակն հավերժացնող խաչքար – հուշաղբյուրը։
Չնայած, որ Արդարադատության միջազգային դատարանը հաստատել է օկուպացված տարածքներում գործող օրենքները՝ ներառյալ մշակութային արժեքների պաշտպանության դրույթները, որոնք արգելում են ցանկացած ժառանգության ոչնչացում, ու չնայած խաչքարերի թիրախավորումը միջազգային մարդասիրական իրավունքի տեսանկյունից համարվում է ծանր հանցագործութուն, այդուհանդերձ Ադրբեջանը պետական մակարդակով շարունակում է իր հակամշակութային, հակամարդկային ու հակաքաղաքակրթական քաղաքականությունը։
