Պայքարող հատվածը կա, թշնամին այդ 10 տոկոս հայից վախենում է
- 17:44 10.01.2024
«Խաղաղության պայմանագիր ասելով ի՞նչ ենք հասկանում՝ պատերազմ, մեր սուվերեն տարածքների կորուստ։ Ի՞նչ անկլավներ, դրանք մեր տարածքներն են։ Այսօր հայն ապրում է հայկական հողի ընդամենը 20 տոկոսի վրա։ Բոլորը մոռացել են այդ ամենը, Նախիջեւանը մոռացվեց, Լեռնային, Դաշտային Ղարաբաղը մոռացվեց, Արեւմտյան Հայաստանը մոռացվեց, մնաց այս 20 տոկոս հողը, որի վրա ապրում ենք, դա էլ այս իշխանություններն անկլավներ են համարում»,- step1.am-ի հետ զրույցում ասաց Սյունիքի մարզի Տեղ համայնքի ավագանու անդամ, Արավուսի նախկին գյուղապետ Արգամ Հովսեփյանը։
Անդրադառնալով հարցին, որ թշնամին երաշխիք է պահանջում, որ հայ ժողովրդի կողմից ռեւանշ չի լինելու, Արգամ Հովսեփյանն ասաց․ «10 տոկոս իրական հայ է մնացել, թշնամին վախենում է այդ 10 տոկոս հայից։ Այսօր մեզ մեր երկրում լռեցնում են այն բանի համար, որ հայ ենք, որ չխոսենք, որ իրենք ինչ ուզեն անեն։ Ո՞նց կլինի այդպես, ո՞վ կարող է ինձ լռեցնել, չեն կարող։ Թող լավ բանեն, մեր հայրենիքը չհանձնեն, մեր հողերը հետ վերադարձնեն, թշնամու վերահսկողության տակ գտնվող հայկական անկլավները հետ վերադարձնեն։ Պայքարող հատվածը կա, թշնամին այդ 10 տոկոս հայից վախենում է։ Եվ կարելի է ասել՝ մեզ այսօր մեր հողում, մեր հայրենիքում դատում են հայ լինելու համար»։
Արգամ Հովսեփյանը հավելեց, որ իրավիճակն այսպես չի կարող շարունակվել, շրջադարձ է լինելու․ «Ամեն ինչ շատ լավ է լինելու, մեր Արցախը, մեր Նախիջեւանը, Արարատը բոլորը հետ ենք վերցնելու։ Սա ժամանակավոր է, այս ամեն ինչը կպրծնի, մենք մեր հայրենիքի տերը կդառնանք։ Ես պատմության մեջ չեմ տեսել մի երկրի ղեկավար, որ իր սուվերեն տարածքը համարի թշնամու տարածք։ Ես այդպիսի բան չեմ կարդացել, չեմ տեսել, չեմ լսել»։