Երեւանում նոր կամուրջ են ուզում կառուցել
- 21:33 16.01.2024
Հայաստանի կառավարությունը մտադիր է նոր կամուրջ կառուցել Երեւանի հյուսիսում։ Նախագծի գաղափարը ներկայացվել է կառավարության ներդրումային կոմիտեի նիստում, որը վարել է Նիկոլ Փաշինյանը։
Ենթադրվում է, որ կամուրջը կառուցվելու է Հրազդան գետի վրայով՝ Թբիլիսյանից մինչև Եղվարդի մայրուղիներ, այսինքն՝ Դավիթաշենի կամրջից մի քանի կիլոմետր բարձր։ Դա կթեթեւացնի մայրաքաղաքի հյուսիսային երթեւեկությունը։ Բացի այդ, Երևանի շրջանցիկ մայրուղին, որն այժմ Արտաշատից մինչև Աշտարակի խճուղի է ձգվում, կտարածվի մինչև Թբիլիսյան խճուղի, որը դուրս է գալիս Երևան-Սևան մայրուղի։
Քննարկվում է նաև Ռուբինյանց և Աճառյան փողոցների միջև նոր ճանապարհի կառուցման հարցը, որը կթեթևացնի նաև Ավան և Նոր Նորք թաղամասերից Կենտրոն երթեւեկությունը։
Մոտավոր հաշվարկներով կամրջի կառուցումը պետք է տևի 4-5 տարի, իսկ Ռուբինյանց-Աճառյան փողոցների միջև ճանապարհի շինարարությունը կարող է ավարտվել ավելի վաղ։