Փաշինյանը պատասխանեց արցախցիներին բնակարաններով ապահովելու մասին հարցին
- 20:23 17.01.2024
«Հայաստան» խմբակցության պատգամավոր Գեղամ Նազարյանը կառավարության հետ հարցուպատասխանի ժամանակ հարցրեց․ «Այս չորս ամսվա ընթացքում կառավարությունում գոնե աշխատանքային խումբ, հանձնաժողով ստեղծվե՞լ է, որը մտածում է, թե արցախցիներին ի՞նչ բնակարանով եւ ինչպե՞ս պետք է բնակարանով ու տնով ապահովենք։ Ես պնդում եմ, որ մենք, առաջին հերթին կառավարությունը, ամեն ինչ պետք է անենք, որ արցախցիների՝ Արցախում արաժանապատիվ ապրելու իրավունքը վերականգնվի, բայց քանի դեռ այդ հարցին չենք հասել, այս պայմաններում մենք ի՞նչ ենք անում՝ արցախցիներին տնով, բնակարանով ապահովելու համար»։
Գեղամ Նազարյանն ասաց, որ արցախցիները շատ են դիմում պատգամավորներին՝ հենց բնակարանային հարցերով։ Մարդիկ փորձում են հստակեցնել՝ ի՞նչ ծրագիր է իրականացվելու՝ իրենց բնակարանով եւ տնով ապահովելու համար։
Նիկոլ Փաշինյանն ի պատասխան ասաց, որ երեք օր առաջ փոխվարչապետի ԼՂ-ից բռնի տեղահանվածների ծրագիրն է ուղարկել իրեն։ «Եվ պայմանավորվել ենք, որ մի շաբաթվա ընթացքում մենք մեծ խորհրդակցություն կհրավիրենք, այդ խորհրդակցության ընթացքում կկայացնենք վերջնական որոշումներ եւ ծրագրին ընթացք կտանք։ Ընդ որում, ես ձեզ կարող եմ որոշ փակագծեր բացել, թե ինչի շուրջ ենք մենք մտածում։ Այսօր պայմանավորվել ենք, որ այդ ծրագիրը կվերաբերի ոչ միայն սեպտեմբերյան իրադարձություններից հետո բռնի տեղահանվածներին, այլեւ 44-օրյա պատերազմի հետեւանքով բռնի տեղահանվածներին։ Այսինքն՝ եթե մինչեւ հիմա մենք ծրագրերի մեջ որոշակի տարբերակում էինք անում, հիմա կփորձենք նրանց նույնպես ընդգրկել ծրագրի մեջ»,- նշեց Փաշինյանը։