Արդյոք էսկալացիայի հավանականությունը կմեծանա՞ տարբեր երկրներում ընտրությունների ընթացքում։ Միրզոյանը կարծում է՝ այո

«Էսկալյացիայի հավանականություն Հայաստան-Ադրբեջան սահմանին այս պահին էլ առկա է»,- այսօր լրագրողների հետ հանդիպման ժամանակ ասաց Հայաստանի արտաքին գործերի նախարար Արարատ Միրզոյանը՝ անդրադառնալով հարցին, թե ԱՄՆ-ում եւ այլ երկրներում այս տարի սպասվող ընտրությունների ժամանակ Ադրբեջանը կարո՞ղ է օգտվել առիթից եւ նոր հարձակում նախաձեռնել Հայաստանի դեմ։

«Այն հռետորաբանությունը, որին ականատես եղանք Ադրբեջանի նախագահի հարցազրույցում, թույլ չի տալիս մեկ վայրկյան անգամ թուլացնել մեր զգոնությունը։ Ավելին, նույն հարցազրույցում մենք լսեցինք անթաքույց տարածքային պահանջներ Հայաստանի Հանրապետության սուվերեն ու ինքնիշխան տարածքների նկատմամբ։ Մենք տեսանք, թե ինչպես են Հայաստանի այս կամ այն քաղաքներն անվանվում ձեւախեղված ձեւով, ամբողջ Հայաստանի Հանրապետությունն անվանվում է «Արեւմտյան Ադրբեջան»։ Եվ, այո՛, էսկալացիայի հավանականություն միշտ էլ կա։ Արդյոք այդ հավանականությունը կմեծանա՞ տարբեր երկրներում ընտրությունների ընթացքում, կարծում եմ, որ ռացիոնալ կլինի այդպես մտածել՝ այո»,- հայտարարեց Միրզոյանը։