ԱԳ նախարարը խոստովանեց, թե ինչի համար են փոխում Սահմանադրությունը
- 21:08 23.01.2024
ԱԳ նախարար Արարատ Միրզոյանն այսօր հրավիրած ասուլիսում անդրադարձավ հարցին, թե ՀՀ Սահմանադրության մեջ եղած հղումը Անկախության հռչակագրին եւ Արցախի ու Հայաստանի վերամիավորման մասին 1989 թվականի դեկտեմբերի 1-ի որոշմանը խանգարո՞ւմ է այսպես կոչված «խաղաղության պայմանագրի» ստորագրմանը, ինչո՞ւ է իշխանությունը նախաձեռնել Սահմանադրության փոփոխության գործընթաց։
Հարց հնչեց նաեւ այն մասին, թե հայկական կողմը խնդիր չի տեսնո՞ւմ Ադրբեջանի Սահմանադրությունում, որով հորինված պետության իրավահաջորդ են իրենց հռչակել, ինչո՞ւ այդ մասին չեն խոսում։
«Երկուստեք, երկու կողմն էլ իրավական խնդիրներ տեսել են այս առումով եւ այդ խնդիրները ներկայացրել են մյուս կողմին։ Երկու կողմն էլ տվել են համապատասխան բացատրություններ։ Այնպես որ, այո, որքան Ադրբեջանն է այդ խնդիրը տեսել եւ ներկայացրել, նույնքան էլ Հայաստանն է Ադրբեջանի ուշադրությունը հրավիրել համարժեք այդպիսի խնդրի իրենց իրավական դաշտում՝ սկսած Սահմանադրությունից»,- ասաց Միրզոյանը։
ԱԳ նախարարը հավելեց․ «Ասել, որ Հայաստան-Ադրբեջան կարգավորման գործընթացն է Սահմանադրության փոփոխության պատճառ, թերեւս չափազանց մեծ չափազանցություն կլինի։ Համաձայն չեմ ձեր պնդման հետ։ Ինչպես դուք եք հարցնում՝ արդյոք Սահմանադրությո՞ւնն է խաղաղության գործընթացի արգելակման պատճառը, եթե շատ կարճ պատասխանեմ՝ ամենեւին ոչ»։
Նա չասեց, թե Բաքվին ի՞նչ պահանջ է ներկայացրել Հայաստանը, թեւրեւս, նման պահանջի բացակայության պատճառով։