Միյատովիչի փոխարեն ԵԽ մարդու իրավունքների հանձնակատար է ընտրվել իռլանդացի Օ’Ֆլաերտին

Եվրոպայի խորհրդի (ԵԽ) Մարդու իրավունքների նոր հանձնակատար է ընտրվել Իռլանդիայից 64-ամյա իրավաբան Մայքլ Օ’Ֆլաերտին։ Հինգշաբթի՝ հունվարի 26-ին, Եվրոպայի խորհրդի խորհրդարանական վեհաժողովի (ԵԽԽՎ) պատգամավորների քվեարկության երկրորդ փուլում 104 խորհրդարանականներ հանդես են եկել ի պաշտպանություն Օ’Ֆլաերտիի։ Նրա մրցակիցներ Մեգլենա Կունևան (Բուլղարիա) և Մանֆրեդ Նովակը (Ավստրիա) ստացել են համապատասխանաբար 70 և 37 ձայն։

Օ’Ֆլահերտին ապրիլի 1-ից կստանձնի ԵԽ մարդու իրավունքների հանձնակատարի պաշտոնը՝ վեց տարի չվերականգնվող ժամկետով։ Նա կփոխարինի 59-ամյա Դունյա Միյատովիչին, ով այդ պաշտոնը զբաղեցնում էր 2018 թվականից։ Մայքլ Օ’Ֆլահերտին 2016 թվականից զբաղեցրել է ԵՄ հիմնարար իրավունքների գործակալության տնօրենի պաշտոնը, իսկ նախկինում եղել է Մարդու իրավունքների իրավագիտության պրոֆեսոր և Իռլանդիայի ազգային համալսարանի Մարդու իրավունքների իռլանդական կենտրոնի տնօրեն, Հյուսիսային Իռլանդիայի Մարդու իրավունքների հանձնաժողովի գլխավոր հանձնակատար և ՄԱԿ-ի մարդու իրավունքների կոմիտեի անդամ:

Մայքլ Օ’Ֆլահերտին ստացել է իրավագիտության աստիճան։ Մի քանի տարի իրավագիտության ոլորտում աշխատելուց հետո նա Հռոմի պապական Գրիգորյան համալսարանում ուսանել է կաթոլիկ աստվածաբանություն և 1987 թվականին ձեռնադրվել քահանա, սակայն ավելի ուշ հրաժարական է տվել։