Հայաստանում է Իրանի նախագահի խորհրդականը

Նիկոլ Փաշինյանն ընդունել է Իրանի Իսլամական Հանրապետության Գերագույն առաջնորդի խորհրդական, արտաքին հարաբերությունների ռազմավարական խորհրդի ղեկավար Քամալ Խարազիին:

Փաշինյանը կարևորել է Քամալ Խարազիի այցը Հայաստան և վստահություն հայտնել, որ այն նոր ազդակ կհաղորդի  Հայաստան-Իրան հարաբերությունների հետագա զարգացմանն ու ամրապնդմանը: Նիկոլ Փաշինյանը նշել է, որ ԻԻՀ նախագահի հետ պայմանավորվել են հետևողական քայլեր ձեռնարկել առևտրաշրջանառության ծավալների շարունակական ավելացման ուղղությամբ: Միաժամանակ, վարչապետը նշել է, որ ջերմությամբ է հիշում ԻԻՀ գերագույն առաջնորդի հետ հանդիպումը և խնդրել նրան փոխանցել իր ջերմ ողջույնները:

Ըստ աղբյուրի՝ զրուցակիցները քննարկել են Հայաստան-Իրան համագործակցության օրակարգին առնչվող տարբեր հարցեր: Նշվում է, որ մտքեր են փոխանակվել Հարավային Կովկասում անվտանգությանն ու կայունությանն առնչվող հարցերի շուրջ: Վարչապետն ընդգծել է ՀՀ առանցքային մոտեցումները տվյալ հարցի շուրջ:

Փաշինյանը նաև կարևորել է Իրանի դիրքորոշումը տարածաշրջանում հաղորդակցությունների ապաշրջափակման հարցում, ինչպես նաև Հայաստանի կառավարության առաջարկած «Խաղաղության խաչմերուկ» նախագծի վերաբերյալ։

Խարազին հանդիպել է Հայաստանի արտգործնախարարի և փոխվարչապետի հետ։ Արարատ Միրզոյանը հանգամանորեն ներկայացրել է Հայաստանի մոտեցումները՝ ընդգծելով Հայաստանի Հանրապետության տարածքային ամբողջականության, սահմանների անձեռնմխելիության և ինքնիշխանության անվիճելի հարգանքի հրամայականը, ինչպես նաև տարածաշրջանում կայուն խաղաղության ապահովման ձգտումը։