Թուրքիային F-35-ների ծրագիր վերադարձնելու հարց առայժմ չկա. Պենտագոն

Թուրքիային F-35 կործանիչների արտադրության ծրագիր վերադարձնելու հարցն այժմ չի քննարկվում։ Այս մասին հայտնել է Պենտագոնի ներկայացուցիչ Պատրիկ Ռայդերը ճեպազրույցում։

Նա այսպես է մեկնաբանել ԱՄՆ պետքարտուղարի քաղաքական հարցերի գծով տեղակալ Վիկտորյա Նուլանդի հայտարարությունը, որը հնարավոր է համարել Թուրքիայի վերադարձը F-35-ների ծրագիր։

«Ես տեսել եմ պետդեպարտամենտի մեր գործընկերների մեկնաբանություններն այս առիթով։ Ինչպես գիտեք, այժմ, քանի դեռ Թուրքիան С-400-ներ ունի, այդ հարցը չի քննարկվում, բայց ես խորհուրդ կտայի ձեզ դիմել պետդեպարտամենտ»,- ավելացրել է Պենտագոնի ներկայացուցիչը։

Նուլանդը նախօրեին հայտնել էր, որ ԱՄՆ-ն ուրախ կլինի ողջունել Թուրքիային F-35 կործանիչների արտադրության ծրագրում, բայց դրա համար Անկարան պետք է լուծի Ռուսաստանից ձեռք բերած С-400 զենիթահրթիռային համալիրների հարցը։