ԱՄՆ դեսպանատունը զգուշացնում է Հայաստանի ճանապարհները փակելու և «առանց նախազգուշացման» անցակետեր տեղադրելու մասին

Երեկ պաշտպանության նախարար Սուրեն Պապիկյանն ասել է, որ նախարարությունը մտադիր է օրենսդրական փոփոխություններ նախաձեռնել և ներդնել տարածքային պաշտպանության հրամանատարության ինստիտուտ։

«Հրամանատարությունը կունենա նաև բանակի սպա, որը կպատրաստի պահեստազորայիններին։ Վերջիններս էլ իրենց հերթին կիմանան, թե ում անմիջական հրամանատարությամբ և որտեղ պետք է իրականացնեն իրենց առաքելությունը։ Այս հարցում մենք պետք է ապահովենք բոլորի համար հավասարություն և ներառականություն»,- ասաց նա։

Ռեզերվների պատրաստումն ու տարածքային պաշտպանությունը վկայում են այն մասին, որ Հայաստանի ղեկավարությունը պատրաստվում է պատերազմի կամ լոկալ բախումների։ Պատերազմի և նոր օկուպացիայի ուրվականը սավառնում է ամենուր, և այն չի կարող ծածկվել կոռուպցիոն սկանդալներով, ցինիկ դեմագոգիայով կամ ձմեռային անվադողերի համար տուգանքներ սահմանելով: Առավել եւս, որ իշխանություններն արդեն խոստովանել են, որ Բաքուն մտադիր չէ «խաղաղության պայմանագիր» կնքել (Մարուքյան)։

Օտարերկրյա դեսպանատները արդեն վաղուց գործում են տարածաշրջանային կամ տեղական պատերազմի նախապատրաստման ռեժիմում։

Ֆրանսիացի բրիգադային գեներալը ԵՄ դիտորդական առաքելության հետ միասին ստուգել է Հայաստանի սահմանները։

Իսկ ԱՄՆ դեսպանատունը 2023 թվականի սեպտեմբերին Արցախում տեղի ունեցած ագրեսիայից հետո առաջին անգամ նախազգուշացում է արել Հայաստանի Հանրապետության տարածքում գտնվող իր աշխատակիցներին՝ կոչ անելով չայցելել Հայաստանի մի շարք մարզեր։

«ԱՄՆ դեսպանատան աշխատակիցներին և նրանց ընտանիքներին արգելվում է որևէ ոչ էական ճանապարհորդություն դեպի հետևյալ վայրեր, ինչը արտացոլում է սահմանափակումների մեղմացում վերջին ծանուցման հրապարակումից ի վեր. Գեղարքունիքի մարզ՝ Վարդենիսից արևելք, Սյունիքի մարզ՝ Գորիսից արևելք, Սյունիքի մարզ՝ Կապանից հարավ, Արարատի մարզի Երասխ գյուղով երթևեկությունը թույլատրվում է, կանգառը՝ ոչ։

ԱՄՆ քաղաքացիները պետք է շարունակեն զգույշ լինել Հայաստանի և Ադրբեջանի միջև բոլոր միջազգային սահմանների մոտ։ Իմացեք, որ ճանապարհի որոշ հատվածներ կարող են առանց նախնական ծանուցման հատել միջազգային սահմաններ: Ճանապարհները կարող են վերահսկվել անցակետերով կամ փակ լինել ճանապարհորդների համար առանց նախազգուշացման», – ասված է հաղորդագրության մեջ։

Դեսպանատունը գրեթե բացահայտ զգուշացնում է, որ մոտ ապագայում Հայաստանի որոշ ճանապարհներ առանց նախազգուշացման կարող են արգելափակվել որոշակի ուժերի կողմից, ինչպես դա եղավ 2020 թվականի դեկտեմբերին Գորիս-Կապան ճանապարհին և 2023 թվականի ապրիլին՝ Հակարի գետի՝ Կոռնիձորի և Տեղի մոտակայքում։

Հայտնի չէ, թե կոնկրետ որ կետերում է ԱՄՆ դեսպանատունն ակնկալում ճանապարհների փակում։

Տեղեկություններ հայտնվեցին նաև Բաքվի հատուկ նշանակության ուժերի զորավարժությունների մասին, որոնք պատրաստվում են ինչ-որ գործողության։

Արդյո՞ք Հայաստանում տարածքային պաշտպանության ստեղծումը կապված է Հայաստանում ճանապարհներ փակելու և այնտեղ անցակետեր տեղադրելու գրեթե ակնհայտ ծրագրերի հետ։ Նոյեմբերի 9-ի հայտարարության կողմերը մտադի՞ր են այս կերպ «լուծել» անկլավների հարցը։

Նաիրա Հայրումյան