Էլ ուրիշ ձեւ չգտա՞ք ձեր հավատարմությունը արտահայտելու, հիմա էլ արցախյան երեխանե՞րը

Լեռնային Ղարաբաղից բռնի տեղահանված 1000 երեխա հնարավորություն կունենա ամառային հանգիստը անցկացնել Հունգարիայում: Այս մասին հայտարարեց Հայաստանի նախագահ Վահագն Խաչատուրյանը Հունգարիայի նախագահ Կատալին Նովակի հետ ասուլիսի ժամանակ:

«Սա ոչ միայն հումանիստական քայլ է, այլ նաև, իսկապես, բարեկամական քայլ է մեր կողմից գնահատվում: Վստահ եմ, որ այն մարդիկ, ովքեր հնարավորություն կունենան Հունգարիայում հանգստանալու, իրենք շատ անգամ ցանկություն կունենան գալ և տեսնել Հունգարիան»,- ասաց Խաչատուրյանը:

Հունգարիայի նախագահ Կատալին Նովակը իր հերթին նշեց, որ 40 միլիոն հունգարական ֆորինտ են տրամադրել հայ ընտանիքներին, ովքեր ստիպված են եղել տեղափոխվել Լեռնային Ղարաբաղից:

« Մենք նաև ամեն բան անում ենք, որպեսզի 1000 երեխա, ովքեր ստիպված են եղել իրենց տները լքել, կարողանան գալ Հունգարիա ճամբարում հանգստանալու, որպեսզի նրանք կարողանան էմոցիոնալ վերականգնվել»,- եզրափակեց Նովակը:

Հայաստանի ռազմատենչ պացիֆիստ նախագահը առաջին այցն է կատարում Հունգարիա այդ երկրի հետ հարաբերությունները վերականգնելուց հետո։ Հիշեցնենք, որ հարաբերությունները խզվել են 2004 թ․ Բուդապեշտում ՆԱՏՕ-ի վարժանքների ժամանակ հայ սպա Գուրգեն Մարգարյանին 2012-ին Բաքու արտահանձնելուց հետո։ 

Հունգարիան Թյուրքական խորհրդում դիտորդի կարգավիճակ ունի, իսկ նրա օդիոզ վարչապետ Օրբանը հանդիսանում է Պուտինի, Էրդողանի եւ Ալիեւի լավագույն ընկերը։ 

Եթե Հայաստանի ղեկավարությունը իրոք որոշել է իր հավատարմությունը հայտնել Թյուրքական աշխարհին եւ անձամբ Օրբանին, լավ կանի՝ սեփական երեխաներին ու թոռներին ուղարկի Հունգարիա հանգստանալու։ Թե՞ Հունգարիան որպես հավատարմության նշան 1000 արցախցի երեխա՞ է ցանկացել ստանալ։ 

Ընդամենը 5 օր առաջ Թուրքիայի նախկին պաշտպանության նախարար Աքարը Օրբանի ընկեր Ալիեւին կացին է նվիրել հետագա գործունեությունների համար։