Երեկ հանցագործն ուղղակի վերադարձել էր իր հանցանքի վայր․ Մետաքսե Հակոբյան
- 19:02 08.02.2024
Արցախահայության իրավունքների պաշտպանության հարցով հրավիրված քննարկման ժամանակ Արցախի Հանրապետության Ազգային ժողովի պատգամավոր Մետաքսե Հակոբյանն անդրադարձավ Ադրբեջանում երեկ տեղի ունեցած ընտրություններին, որոնք անցկացվել էին նաեւ Արցախում։ Նա նշեց, որ երեկ հայտնվել էին զգացմունքային իրավիճակում, երեւի հենց դա է պատճառը, որ Արցախի ԱԺ-ն ուժ չգտավ արձագանքելու այն ամենին, ինչ տեղի ունեցավ։
«Երեկ՝ 2024 թվականի փետրվարի 7-ին Արցախում տեղի ունեցավ այն, ինչ իրականում որեւէ մեկս չէինք կարող պատկերացնել։ Բայց ինձ համար մեկ բան էր պարզ, որ երեկ հանցագործն ուղղակի վերադարձել էր իր հանցանքի վայր։ Եվ այդ չակերտավոր, կեղծ ժողովրդավարն առանց հիմնավորումների ընտրությունների գնաց։ Չհրավիրվեցին հատուկ դիտորդներ, իսկ անցակալիներին ուղղակի թույլ չտվեցին մուտք գործել։ Տպավորություն է ստեղծվել, որ կային այլ թեկնածուներ, սակայն իրականում բոլորն Ալիեւի համախոհներն էին։ Մինչ ընտրությունները Ադրբեջանի բռնապետը դատարկում էր քաղաքական դաշտը եւ ճնշում էր այլակարծությունը։ Նա քվեարկում է իր իսկ հանցանքի վայրում, եւ այս ամենն ամբողջ աշխարհի աչքի առջեւ ու ցինիկ կեցվածքով»,- ասաց նա։
Մետաքսե Հակոբյանը նշեց, որ այս ամենը մեր աչքի առաջ անում են նաեւ Հայաստանի Հանրապետության իշխանությունները։ Եվ այն զուգահեռները, որոնք երբեմն տարվում են Հայաստանի եւ Ադրբեջանի իշխանությունների միջեւ, այսօր որպես փաստ կայանում են։