Հայաստանի կառավարությունը քաշքշուկն օգտագործում է արցախցիների քաղաքական ակտիվությունը թուլացնելու համար
- 21:37 13.02.2024
Լեռնային Ղարաբաղի Ազգային ժողովի առաջին և երկրորդ գումարման պատգամավոր Աշոտ Սարգսյանը կարծում է, որ ներքին տեղահանվածների վերաբերյալ ՀՀ կառավարության բոլոր որոշումներն ուղղված են Արցախի բնակիչներին անվերջ բյուրոկրատական քաշքշուկների և հերթերի մեջ ներքաշելուն։
«Այս ամենն արվում է, որպեսզի արցախցիների կյանքը Հայաստանում անտանելի թվա, և նրանք հեռանան երկրից։ Եվ նաև՝ Արցախի ժողովրդին շեղել քաղաքական կարևոր գործընթացներից՝ թաղելով սոցիալական խնդիրների ճահճում»,- ասաց Սարգսյանը։
Նա նաև չբացառեց, որ կառավարության նոր որոշումը տանտերերի և վարձակալների, այսինքն՝ տեղացիների և փախստականների միջև լարվածություն առաջացնելու ևս մեկ փորձ է։
Հիշեցնենք, որ փետրվարի 12-ին Հայաստանի ՆԳՆ-ն հրապարակել էր փաստաթղթերի նոր ցանկ, որոնք հարկ է տրամադրել ներքին տեղահանված անձանց գրանցման համար։ Անձը հաստատող փաստաթղթերի հետ միասին, ըստ ցանկի, պետք է ներկայացնել նաև տվյալ տարածքում բնակվելու իրավունքի ապացույց։ Նշվում է, որ Լեռնային Ղարաբաղից հարկադիր միգրանտն իրավունք չունի առանց գրանցման որեւէ գործարք կատարել Հայաստանում։