«Մեր պահանջները հիմնվում են հավաքական վերադարձի իրավունքի վրա, ոչ թե անհատական»
- 15:59 15.02.2024
«Երբ խոսում ենք վերադարձի մասին, բոլորս պետք է ֆիքսենք, որ խոսքը հավաքական վերադարձի մասին է եւ ոչ թե անհատական վերադարձի։ Տեսնում ենք, որ դերակատարներ կան, որոնք կարող է շահագրգռված լինեն արցախցիների անհատական վերադարձով, որը միգուցե ինչ-որ առումով նրանց համար երեսը փրկելու գործիք կամ մեխանիզմ կարող է ծառայել։ Իսկ Արցախի ժողովրդի պահանջը ոչ թե անհատական վերադարձն է, այլ կոլեկտիվ։ Անհատական վերադարձը հավասարազոր է Արցախի նկատմամբ մեր իրավունքների զիջմանը»,- այսօր հրավիրած ասուլիսում ասաց Արցախի ՄԻՊ Գեղամ Ստեփանյանը։
Նա նշեց, որ իր տեղեկություններով՝ այս պահին Արցախում 20-21 անձ է ապրում, որոնք կորցրել են իրենց ինքնությունը։
«Գիտենք՝ ինչ պայմաններում են ապրում, բոլոր հնարավորություններից զրկված, Կարմիր խաչի կողմից ընդամենը սնունդ են ստանում։ Եվ չենք կարող ասել, որ արժանապատիվ հայկական կենսակերպով են ապրում։ Դրա համար շատ կարեւոր է ֆիքսել, որ մեր պահանջները հիմնվում են հավաքական վերադարձի իրավունքի վրա, ոչ թե անհատական»,- հավելեց Ստեփանյանը։