Ինչի մասին է Իրանը զգուշացրել Հայաստանի փոխվարչապետին և ով է «հսկում» Կապանը

Հայկական լրատվամիջոցները գրում են, որ Իրանի նախագահը փոխվարչապետ Մհեր Գրիգորյանի գլխավորած հայկական պատվիրակությանը իբր «զգուշացրել է», որ Թեհրանը հավանություն չի տա ռուսական զորքերը դուրս բերելու և դրանք արևմտյան անվտանգության համակարգով փոխարինելու Հայաստանի որոշմանը։

Կասկածից վեր է, որ Իրանը չի ցանկանում, որ արեւմտյան զորքեր հայտնվեն տարածաշրջանում, հատկապես հայ-իրանական սահմանի մոտ։ Բայց ակնհայտ է, որ Իրանն ավելի շատ չէր ցանկանա այնտեղ ռուսական զորքեր տեսնել։ Եվ այս համատեքստում ակնհայտ է, որ ռուսական զորքերի դուրսբերմանն Իրանի անհամաձայնության «թեզը» ներդրվել է Մոսկվայից։

Իրականում Իրանում, ի տարբերություն հայկական շատ շրջանակների, հստակ տեսնում են, որ ռուսական զորքերը գործում են թուրքական զորքերի հետ համատեղ՝ որպես գործիք օգտագործելով Բաքուն։ Բաքուն, ինչպես գրում են միջազգային լրատվամիջոցները, ի հեճուկս իսլամական համերաշխության, չի նախատել Իսրայելին Գազայում իր գործողությունների համար։ Իրանը տեսնում է, որ Էրդողանն իրեն արդարացնելու համար թատերականացված հայտարարություններ է անում Իսրայելի դեմ, մինչդեռ Բաքուն շարունակում է նավթ մատակարարել Իսրայելին և շատ ավելին:

Ռուսաստանը շարունակում է իր ներկայությունը Արցախում, և Ակնայում գտնվող ռուս-թուրքական կենտրոնի հայացքի ներքո Իսրայելը Բաքվի հետ միասին Իրանին սահմանակից ղարաբաղյան օկուպացված տարածքները վերածում է հակաիրանական ցատկահարթակի։

Ինչո՞ւ սրանից հետո Իրանը պետք է ցանկանա, որ ռուսական զորքերը Հայաստանում լինեն։

Բացի այդ, Իրանն ամեն ինչ անում է ցույց տալու, որ միայն Թեհրանի ներկայությունն է զսպում այն ​​ուժերին, որոնք ցանկանում են գրավել Հայաստանի հարավը։

Երեկ Կապանում Իրանի գլխավոր հյուպատոս Մորթազա Աբեդին Քարամին NEWS.am-ին տված հարցազրույցում ասաց. «Լավ հիշում եմ Կապանում Իրանի հյուպատոսության բացման օրը, այդ օրվա համեմատ Կապանում մարդիկ ավելի հանգիստ են զգում, իրավիճակը փոխվել է 180 աստիճանով»։ Սա հայ-իրանական սահմանը «պահպանող» ռուսական զորքերի իրական գնահատականն է։

Նաիրա Հայրումյան