Պատասխանատու չկա․ ո՞ւմ դիմի քաշաթաղցի 5 երեխատեր ընտանիքը
- 16:34 18.02.2024
Եպրաքսիան իր ամուսնու և 5 անչափահաս երեխաների հետ 2020թ. տեղահանվել էր Արցախի Քաշաթաղի շրջանի Արախիշ համայնքից: Երեխաներից մեկն ունի լուրջ առողջական խնդրիրներ, ինչի պատճառով 2 տարով նշանակվել էր նպաստ, 2023 թ. բժշկական զննություն անցնելուց հետո սեպտեմբերին նորից նպաստ է նշանակվել կրկին 2 տարով:
Սակայն սեպտեմբերից մինչ այսօր նրանք չեն կարողանում ստանալ իրենց հասանելիք հաշմանդամության նպաստը: Եպրաքսիան պատմում է, որ սկզբում ասում էին, որ նման ծրագիր չկա, հետո նրանցից պահանջեցին հաշվառվել, մի առ ժամանակ հետո ասացին, որ ամուսինը ևս պետք է հաշվառվի: Ամուսնու հաշվառումից հետո ասացին, որ ծրագիր չկա պետք է սպասել:
Եպրաքսիան այս անգամ արդեն դիմեց Մալաթիա-Սեբաստիայի միասնական ծառայություն՝ դիմում է գրել, բայց հունվարին դիմումը մերժվել էր, քանի որ երեխան ևս պետք է հաշվառվեր: Հաշվառումից հետո ասացին, որ հիմա էլ պետք է անձնագիրը փոխել, այն հարցին, թե ինչու հիմա են ասում, պատասխանեցին, որ հրամանը նոր է:
Փետրվարի 8-ին նորից փորձեցին դիմում ներկայացնել, սակայն որպես արցախցի նոր անձնագրերով չէր ստացվում դիմում ներկայացնել, քանի որ համակարգը ցույց էր տալիս, որ նրանք ՀՀ քաղաքաիներ են, իսկ այդ դեպքում դիմում նախատեսված չէր:
Վերջին տարբերակը թեժ գիծն էր, որտեղ ասացին, որ պետք է դիմեն Նալբադյան 13: Նալբանդյան 13-ում էլ ասացին 10-15 օր պետք է սպասել, նորից դիմել տարածքային կենտրոն:
Արդյունքում ստացվում է, որ Մալաթիայի տարածքային կենտրոնը դիմում չի ընդունում, իսկ Նալբանդյան 13-ում ասում են, որ դիմումը ընդունվել է:
Ակնհայտ է, որ հարցին լուծում տալու ճանապարհները ոչ ոք չգիտի, քանի որ միտումնավոր ստեղծվել է լղոզված համակարգ, որտեղ ոչ ոք ոչ մի բանի համար պատասխանատու չէ։
Իսկ ժամանակը մինչև մարտի 11-ն է, հակառակ դեպքում ՝ այս ամիսների նպաստը զրոյացվելու է:
Քրիստինա Ալավերդյան
