Մոսկվայում ձերբակալված և Հայաստանի կողմից հետախուզման մեջ գտնվող ադրբեջանցին ազատ է արձակվել
- 17:25 21.02.2024
Փաստաբանը հայտարարել է ֆիթնեսի մարզիչ Քամիլ Զեյնալիին Մոսկվայում կալանքից ազատելու մասին։ Այս մասին հայտնում են ադրբեջանական լրատվամիջոցները։
Փաստաբանի խոսքով՝ նախկինում կալանավորված Զեյնալին ազատ է արձակվել Ադրբեջանի դիվանագիտական ներկայացուցչության աջակցությամբ։ Նա այսօր կվերադառնա Բաքու։
Հիշեցնենք, որ փետրվարի 21-ի առավոտյան Զեյնալին սոցցանցում հայտնել էր, որ իրեն տարել են «Դոմոդեդովո» օդանավակայանի ոստիկանական բաժանմունք, երբ պատրաստվում էր վերադառնալ Բաքու։ Զեյնալիի խոսքով՝ իրեն կալանավորել են Հայաստանի պահանջով։
Ավելի ուշ Հայաստանի ներքին գործերի նախարարությունը հայտարարեց, որ Ադրբեջանի քաղաքացի Քամիլ Զեյնալին սպանության համար միջազգային հետախուզման մեջ է։ Հաղորդվում է, որ ֆիթնես մարզիչը կասկածվում է 44-օրյա պատերազմի ժամանակ տարեց Լեռնային Ղարաբաղի բնակչին գլխատելու մեջ։