Ֆրանսիան Հայաստանի հետ քննարկում է օդային պաշտպանության միջոցների և զրահատեխնիկայի մատակարարման հարցը
- 12:47 22.02.2024
Ֆրանսիայի պաշտպանության նախարար Սեբաստյան Լեկորնյուն շուտով կայցելի Հայաստան։
«Առաջիկայում ես կգնամ Հայաստան՝ խորհրդարանականների և արտադրողների մեծ պատվիրակության գլխավորությամբ։ Սա պատմության մեջ առաջին դեպքն է, երբ Ֆրանսիայի պաշտպանության նախարարը գնում է Հայաստան»,- ասել է Լեկորնյուն RTL ռադիոյի եթերում։
Նրա խոսքով, «Հայաստանը կանգնած է անվտանգության լուրջ մարտահրավերների առաջ, այդ թվում՝ ինքնիշխանության և սահմանների պաշտպանության հարցերում, ինչը կապված է Ադրբեջանի սպառնալիքների հետ»։
Ինչպես նշել է նախարարը, Ֆրանսիան պարտավորություն ունի աջակցել Հայաստանին՝ նրա պաշտպանական ներուժը մեծացնելու համար։
Խոսքը օդային պաշտպանության միջոցների և զրահատեխնիկայի մասին է, բայց «զուտ պաշտպանական նպատակներով», – հավելել է Լեկորնյուն: