Harmony Room. ներդաշնակություն ներսից ու դրսից
- 21:33 26.02.2024
Արցախի բնակչուհի լրագրող Քնարիկ Կարապետյանը Ստեփանակերտից տեղահանվելուց հետո Երևանում հիմնել է իր անձնական փոքրիկ բիզնեսը:
Harmony Room –ը մինիմալիստական ճաշակ, կազմակերպվածություն, հարմարավետություն ստեղծելու մասին է: «Ձեռքի աշխատանքի հանդեպ հետաքրքրվածությունը միշտ է ուղեկցել: Մտերիմներիս հավաստմամբ ես օժտված էի այդ ձիրքով: Տանը միշտ պահում էի գեղեցիկ փաթեթներ, ժապավեններ: Ստեփանակերտում մի քանի տարի առաջ ես ու եղբայրս բիզնես ունեինք` կավից զարդեր, մագնիսներ էին պատրաստում»,- վերհիշում է Քնարիկը:
Շրջափակման ընթացքում հնարավոր չէր շարունակել հանդիսավարի աշխատանքը և պետք էր նոր զբաղմունք, որը նաև եկամուտ կբերեր: Կարգուկանոնի հանդեպ սերը ստիպեց մտածել հելյունով զամբյուղներ գործելու մասին: Քնարիկը խոստովանում է, որ երբեք հելյունագործություն չի ուսումնասիրել, ընդամենը յութուբյան ալիքներում մի քանի տեսահոլովակ է նայել, բայց դա իրեն բավարար էր գործընթացն իրականացնելու համար:
Դրական արձագանքներից հետո որոշեց ապրանքատեսակները դնել վաճառքի: Չնայած նոր է ֆեյսբուքյան էջ բացել, բայց արդեն պատվերներ է գրանցել: Հետագայում միտք ունի տեսականին ընդլայնել` ավելացնելով խաղալիքներ, վերմակներ, նորածինների համար զամբյուղներ:
Տաթև Ազիզյան
