Ստեփանակերտ, Գարեգին Նժդեհ․ Պալիտի թաղը

Ստեփանակերտի Գարեգին Նժդեհ թաղամասը գտնվում է քաղաքի ամենակենտրոնում՝ Մարտունու և Մագդա Նեյման փողոցներին կից: Փողոցից մի փոքր ներքև գտնվում է քաղաքի հրշեջ կայանը և հանրահայտ «պալիտի շենքը», ինչի պատճառով փողոցը անվանում են կամ «պաժարնուն տիյերի թյաղը», կամ «պալիտին տիյերի թաղը»:

Դեպի թաղամաս տանող խաչմերուկում գտնվում էր Ստեփանակերտի մամուլի ակումբը:

Նժդեհի փողոցի կենտրոնում «Բորիկ ձյաձայի մագազինն էր», իսկ խանութի առաջ փոքրիկ սեղան կար, որտեղ պապիկները խաղում էին՝ հիմնականում նարդի:

Փողոցում փոքրիկ հողաբլուր կար, իսկ հողաբլուրի հենց տակը աղբարկղեր: Ձմռանը դա երեխաների ամենասիրելի վայրն էր՝ սահնակ էին քշում: Առանձին մարտահրավեր էր երեխաների համար՝ սահնակ քշել մինչև հողաբլրի հենց ծայրը և աղբարկղերի մեջ չընկնելը:

Այդ փողոցի երեխաները, որոնք հիմա արդեն բավականին մեծ և հասուն մարդիկ են, հիշում են հենց ձմեռը, ցուրտ օրերը, տարաներով բերվող ջրերը՝ սառցադաշտ սարքելու համար և իհարկե այդ ամենի պատճառով ջղայն հարևաններին, որոնք ստիպված տան պատերից բռնած էին իջնում:

Քրիստինա Ալավերդյան