Արցախի պահեստազորի սպաների միության բաց նամակը բնակարանային ապահովման ծրագրի վերաբերյալ

Հարգելի՛ փոխվարչապետ, Ձեր կողմից ներկայացված ծրագրի դրույթները մեծ դժգոհություն են առաջացրել Արցախից բռնի տեղահանված պահեստազորի զինծառայողների բազմաթիվ ընտանիքներում:

Հանդիպումների և քննարկումների արդյունքում «Արցախի պահեստազորի սպաների միություն» հասարակական կազմակերպությունը ուսումնասիրություններ է կատարել այդ մասով և եկել ընդհանուր հետևյալ կարծիքի.

Առաջարկվող աջակցությունը չի համապատասխանում Հայաստանի Հանրապետության անշարժ գույքի գնաշուկային: Ձեր կողմից նշված գումարներով անհնար է բնակելի տարածություն ձեռք բերել, հատկապես փոքրաթիվ կազմով ընտանիքների համար:

Հաշվի առնելով, որ Արցախից բռնի տեղահանված ընտանիքների մեծամասնությունը մտադիր է ապրել և արարել Հայաստանի Հանրապետության տարածքում, անհրաժեշտ է ստեղծել հնարավոր պայմանները նրանց պահելու բարեկեցիկ միջավայրում՝ գոնե բնակելի տարածքի ձեռքբերման անհրաժեշտ աջակցություն տրամադրելու միջոցով:

Անհրաժեշտ է մշակել արցախցիների արտագաղթը կանխող ծրագրեր, ինչը հետագայում նաև կունենա Արցախում անվտանգ ու բարեկեցիկ պայմաններ ստեղծվելու դեպքում արցախցիների վերադարձին նպաստող դեր:

Տեղեկացնում ենք, որ միությունն ունենալով Արցախում բնակարանային ապահովման ծրագրերում մշակման և իրագործման հարուստ փորձ, կազմել է առաջարկների մանրամասն հետազոտական արդյունքների հիմքով կազմված փաթեթ, որը պատրաստ ենք հանդիպել և ներկայացնել ձեզ կամ համապատասխան կառույցներին՝ Արցախից բռնի տեղահանված ընտանիքներին պետական պատշաճ հոգածություն ցուցաբերելու համար:

ԱՐՑԱԽԻ ՊԱՀԵՍՏԱԶՈՐԻ ՍՊԱՆԵՐԻ ՄԻՈՒԹՅՈՒՆ

ՀԱՍԱՐԱԿԱԿԱՆ ԿԱԶՄԱԿԵՐՊՈՒԹՅԱՆ ՎԱՐՉՈՒԹՅՈՒՆ