«Ենթադրում եմ, որ սա բավարար կլինի ռուսական կողմի համար, եւ հարցն այդքանով կլուծվի». Միրզոյան

Այսօր հրավիրած ասուլիսում հարց ուղղվեց ՀՀ ԱԳ նախարար Արարատ Միրզոյանին՝ խոսքը միայն «Զվարթնոց» օդանավակայանից ռուս սահմանապահներին հանելու մասի՞ն է, թե Հայաստանի մյուս տարածքներից եւս, այդ թվում՝ հայ-թուրքական սահմանից։

«Հայտարարությունը եղել է Զվարթնոցի մասին, հետեւաբար, խոսում ենք միայն Զվարթնոցի մասին»,- արձագանքեց Արարատ Միրզոյանը։

«Ռուսական կողմը տեղեկացվել է հայկական կողմի այս նախաձեռնության մասին։ Ի սկզբանե ռուսական սահմանապահների մասնակցությունը մի շարք կետերում, այդ թվում՝ «Զվարթնոց» օդանավակայանում, մտածված է եղել՝ իբրեւ աջակցություն նորանկախ հայկական պետականությանը։ Եվ նախատեսված էր այդ գործառույթն իրականացնել այնքան ժամանակ, քանի դեռ Հայաստանը դրա կարիքը կունենար։ Եվ երբ Հայաստանը կունանա իր ինստիտուցիոնալ հնարավորությունները, այդ գործառույթն ամբողջությամբ կիրականացվեն Հայաստանի պատկան մարմինների միջոցով։ Եվ, ահա, հիմա մենք կարծում ենք, որ Հայաստանի Հանրապետությունն ինստիտուցիոնալ առումով ի զորու է Զվարթնոց օդանավակայանում միայնակ իրականացնելու սահմանապահ ծառայությունը, եւ ծանուցել ենք ռուսական կողմին այս մասին։ Ենթադրում եմ, որ սա բավարար կլինի ռուսական կողմի համար, եւ հարցն այդքանով կլուծվի»,- հայտարարեց Միրզոյանը։