Չկրակելու հրաման չկա, բայց կա՞ կրակելու հրաման
- 16:49 13.03.2024
Պաշտպանության նախարար Սուրեն Պապիկյանից այսօր լրագրողները հետաքրքրվեցին, ճի՞շտ են մամուլի հրապարակումները, որ Տավուշի 4 գյուղերից հայկական զորքերն առաջիկայում պետք է դուրս բերվեն։ Պապիկյանը հարցին ուղիղ պատասխանելու փոխարեն ասաց․ «Զինված ուժերը շարունակում են իրականացնել իրենց խնդիրը»։
Հարցերին, թե 4 գյուղերը հանձնվելու են, Տավուշում ի՞նչ է տեղի ունենալու, Ադրբեջանը հայկական 31 գյուղերը վերադարձնելո՞ւ է, հայկական զորքերը հե՞տ են քաշվելու Տավուշի չորս գյուղերից, Պապիկյանը միայն պատասխանեց․ «Երեկ վարչապետը բոլորի հարցերի պատասխանը տվեց»։
Հարցին, թե շփման գծում զինծառայողն ի՞նչ իրավիճակում կարող են կրակել, նա պատասխանեց․ «Ըստ իրեն տրված հրամանի»։ Ճշտող հարցին՝ այսինքն՝ չկրակելու հրամա՞ն կա, նա արձագանքեց․ «Ո՛չ, չկրակելու հրաման չկա»։