“Ավո” ակումբի տղաները դեռ կհիշեցնեն, որ ամեն ինչ Մարտունիից է սկսվել

Գրել «Ավո» մանկապատանեական ֆուտբոլային թիմի մասին պատրաստվում էինք դեռ 2023թ. սեպտեմբերին, բայց հայտնի իրադարձությունները ստիպեցին անորոշ ժամանակով հետաձգել նյութը:

Թիմը ստեղծվել է 2020թ. պատերազմից հետո, երբ ակումբի հիմնադիր և մարզիչ Նարեկ Մկրտչյանը որոշեց Մարտունու երեխաներին հնարավորություն ընձեռել զբաղվելու իրենց սիրելի սպորտաձևով:

2021  թ. ակումբը սկսեց գործել: Մասնակիցների թիվը սկզբում 15 էր, հետո արդեն ՝30, ընդ որում երեխաները գալիս էին նաև շրջկենտրոնի հարակից գյուղերից՝ Գիշի, Բերդաշեն:

Թիմի անվան մասին խոսելիս Նարեկը նշում է, որ գլխավոր նպատակը ոչ միայն լեգենդար հրամանատարի անունը հիշատակելն էր, այլեւ երեխաների մոտ հրամանատարի անմնացորդ հայրենասիրության սերմանումը:

Շրջափակման ժամանակ նույնիսկ չթողեցին իրենց պարապմունքները՝ մարտունեցիներին հատուկ կամքով և համառությամբ:

«Ավո» թիմի վերջին պարապմունքը տեղի է ունեցել սեպտեմբերի 17-ին Մարտունիում: Այն Մարտունիում, որի մասին խոսելիս հիշում ես նուռը, արմավենիները և արցախցու «կոխկահաստությունը»:

Այժմ թիմի սաները ապրում են տարբեր վայրերում, եւ չկա հնարավորություն շարունակել ակումբի գործունեությունը։ Բայց կարևորն այն է, որ թիմի անդամները շարունակում են պարապմունքները ՀՀ-ի տարբեր ակումբներում և տարիներ հետո նրանք կհիշեցնեն, որ ամեն ինչ սկսվել էր Մարտունիի «Ավո» թիմից:

Քրիստինա Ալավերդյան

Ֆոտոն արվել է 2023-ի սեպտեմբերի 29-ին