Գյումրու տեղեկատվական տեխնոլոգիաների կենտրոնն արցախցի կանանց առաջարկում է անվճար բիզնես ուսուցում

Ծրագիրը նախաձեռնվել է միայնակ մայրերի և Լեռնային Ղարաբաղից տեղահանված կանանց համար։

Ծրագիրն անվճար է, հայտերն ընդունվում են մինչև ապրիլի 5-ը։ Բացի Երևանից, մասնակից կարող են դառնալ Շիրակի, Լոռու և Արմավիրի կանայք։ Ծրագրին մասնակցելու միակ և կարևոր պայմանը բիզնես գաղափարի առկայությունն է։

Ինչպես Step1.am-ին հայտնեցին Գյումրու տեղեկատվական տեխնոլոգիաների կենտրոնում (ԳՏՏԿ), երեք ամսվա ընթացքում կանայք կստանան համապատասխան գիտելիքներ տարբեր ոլորտներում՝ հաշվապահություն, գրաֆիկական դիզայն, մարքեթինգ, առցանց վաճառք և այլն, իրենց բիզնես գաղափարներն իրականացնելու համար։ Ծրագիրը կնպաստի կանանց զբաղվածությանը։

Ուսումնական փուլում, դասընթացներին զուգահեռ, կանայք GITC-ի և մենթորների աջակցությամբ կկազմեն իրենց գաղափարներին համապատասխան բիզնես պլան, որը կներկայացվի ծրագրի հաջորդ փուլում ժյուրիին և կստանա ֆինանսավորում մինչեւ 2 մլն դրամի չափով։

«Նորարարական կրթության և բիզնեսի կենտրոն» կրթական ծրագիրը միայնակ մայրերի և Լեռնային Ղարաբաղից ներքին տեղահանված կանանց համար իրականացվում է «Կանանց տնտեսական հզորացման արագացուցիչ» նախաձեռնության շրջանակում։

Ալվարդ Գրիգորյան