Աղազարյան․ Եթե մենք այս քայլը կատարենք, իրենք ընդառաջ քայլ չկատարեն, ապա մենք մտնում ենք տուպիկ

«Քաղաքացիական պայմանագիր» խմբակցության պատգանավոր Հովիկ Աղազարյանը խորհրդարանում լրագրողների հետ ճեպազրույցում անդրադարձել է հարցին, թե ինչո՞ւ է իշխանությունը միակողմանի զիջումների գնում եւ թշնամուն հանձնում հայկական բնակավայրերը։

«Եթե դա կարող է դիտվել միակողմանի քայլ, թող այդպես դիտվի, տեսնենք միջազգային հանրությունն ինչ է ասում։ Մենք, լինելով այս տարածաշրջանում շատ դժվար աշխարհաքաղաքական իրավիճակում, ունենալով Թուրքիայի եւ Ադրբեջանի պես հարեւաններ, մեր հնարավորությունները շատ սահամանափակ են։ Մենք պետք է անպայման մեր քայլերի մեջ ներգրավենք միջազգային ուժերի ուշադրությունը։ Մենք անում ենք ընդառաջ քայլ խաղաղության գործընթացների տրամաբանության մեջ»,- ասել է Աղազարյանը։

Միաժամանակ նա նշել է, որ թշնամուց ընդառաջ քայլեր չի տեսնում․ «Եթե մենք հիմա այս քայլը կատարենք, իրենք ընդառաջ քայլ չկատարեն, ապա մենք մտնում ենք տուպիկ»։

Հովիկ Աղազարյանը հավելել է․ «Տավուշի մարզում չկան գյուղեր, որոնք պետք է հանձնվեն Ադրբեջանին։ Տավուշի մարզում կան բնակավայրեր, որոնք պատկանել են ադրբեջանական խորհրդային հանրապետությանը, եւ դրանք ոչ թե պետք է հանձնվեն, այլ պետք է վերադարձվեն իրենց վերահսկողությանը»։