ՀՀ քաղաքացիություն ստացած արցախցիները չեն կարողանում ID քարտ ձեռք բերել

ՀՀ քաղաքացիություն ստացած արցախցիները չեն կարողանում Հայաստանում ID քարտ ձեռք բերել։ Անձնագրային եւ վիզաների վարչությունում արցախցիներին  հիմնավորում են, որ նրանց մասին տեղեկատվություն չկա կամ ID քարտի վրա արցախցիների ծննդավայրը պետք է նշվի «Ադրբեջան»։ Խնդիրն այն է, որ ID քարտերում որպես ծննդավայր նշվում է երկիրը, ոչ թե քաղաքը։

Step1.am-ի թղթակիցն այս հարցի վերաբերյալ պարզաբանում խնդրեց ՆԳՆ Միգրացիայի եւ քաղաքացիության ծառայության ղեկավար Արմեն Ղազարյանից։

Արմեն Ղազարյանն ասաց, որ իրավական խոչընդոտ չկա, սա տեխնիկական խոչընդոտ է, որին լուծում կտրվի։

«Աշխատանք է տարվում, որպեսզի նշվի ոչ թե երկրի անունը, այլ քաղաքը, որի ծրագրային լուծումը մենք դեռեւս չունենք, բայց առաջիկայում կներդրվի։ Ծննդավայր տողում հնարավորություն է լինելու գրել նաեւ քաղաքը, ինչպես արվում է անձնագրերում»,- ասաց նա։

Արմեն Ղազարյանը հավելեց, որ ծրագրային լուծումը կներդրվի առաջիկա ամսվա ընթացքում։