Լեդի Քոքսի հանդիպումը Ստեփանակերտի վերականգնողական կենտրոնի անձնակազմի հետ – Երևանում
- 00:03 09.04.2024
Օրերս բարոնուհի Քերոլայն Քոքսի հերթական այցն էր Հայաստան։
Քերոլայն Քոքսը Ստեփանակերտի վերականգնողական կենտրոնի հիմնադիրն է։ Լեդի Քոքսը երկար տարիներ աջակցություն է ցուցաբերել Արցախին թե՛ պատերազմի, թե՛ հետպատերազմյան շրջանում։
Նրա նախաձեռնությամբ 1998 թվականին բացվել է Ստեփանակերտի վերականգնողական կենտրոնը, որը հետագայում անվանակոչվել է նրա անունով։ Արցախի ամբողջական օկուպացիայի արդյունքում Վերականգնողական կենտրոնը դադարեցրել է իր գործունեությունը։ Եվ կենտրոնի գոյության 25 տարիների ընթացքում առաջին անգամ լեդի Քոքսի հանդիպումը Վերականգնողական կենտրոնի անձնակազմի հետ տեղի ունեցավ Արցախից դուրս՝ Երևանում։
Այժմ Վերականգնողական կենտրոնը գործում է հասարակական կազմակերպության շրջանակներում։ Աշխատակիցները կենտրոնի տնօրեն և հիմնադիր, Արցախի Հանրապետության առողջապահության նախարար Վարդան Թադևոսյանի խիստ ղեկավարությամբ իրականացնում են տնային այցեր՝ օգնելով հաշմանդամություն ունեցող անձանց Արցախից և Հայաստանից։
Չնայած պատկառելի տարիքին՝ Քերոլայն Քոքսը միշտ արցախցիների հետ է և պատրաստ է աջակցել նրանց։ Նա հույս ունի, որ համատեղ ջանքերով հնարավոր կլինի միջոցներ հայթայթել Հայաստանի տարածքում նոր ժամանակակից վերականգնողական կենտրոնի ստեղծման համար։
Բայց նա չի կորցնում հույսը, որ Ստեփանակերտի վերականգնողական կենտրոնն իր դռները կվերաբացի Արցախի տարածքում։
Արսեն Աղաջանյան