Ադրբեջանը կրակելով որոշակի աջակցություն է տրամադրում Հայաստանի իշխանություններին․ Աբրահամյան

«Ադրբեջանի կողմից վերջին մի քանի օրերին թիրախավորվում են նաեւ խաղաղ բնակավայրերը։ Ես ուզում եմ հիշեցնել, որ 44-օրյա պատերազմից հետո, երբ այս իշխանությունը հանձնեց Արցախի Քաշաթաղի շրջանը, եւ մեծ թվով բնակավայրեր դարձան Ադրբեջանի հետ սահմանակից, այդ բնակավայրերն այդ ընթացքում չէին թիրախավորվել։ Շփման գծում եղել էին որոշակի միջդապեր, նաեւ մահվան ելքով, բայց բնակավայրերը չէին թիրախավորվել։ Բավական երկար ժամանակ չէին թիրախավորվել նաեւ Տավուշի մարզի այն բնակավայրերը, որոնք շաբաթ օրը Ադրբեջանի կողմից գնդակոծվել էին։ Որքան էլ դրանք ներկայացվում են որպես անկանոն կրակոցներ, պետք է արձանագրել, որ դրանք կարող էին նաեւ մահվան պատճառ լինել խաղաղ բնակչության շրջանում»,- այսօր Ազգային ժողովում լրագրողների հետ ճեպազրույցում ասաց «Պատիվ ունեմ» խմբակցության պատգամավոր Տիգրան Աբրահամյանը։

Անդրադառնալով հարցին, թե լայնամասշտաբ ռազմական գործողություններ կլինե՞ն, Աբրահամյանը պատասխանեց․ «Ես լայնամասշտաբ գործողությունների հնարավորություն այս պահին չեմ տեսնում։ Ոչ թե այն պատճառով, որ Ադրբեջանն ագրեսիվ չէ կամ ընդունակ չէ դրան, այլ կարծում եմ, որ այս փուլում ադրբեջանական քաղաքական նպատակներն ոչ թե ենթադրում են լայնամասշտաբ գործողություններ, այլ չեմ բացառում սահմանափակ ճակատով որոշակի գործողությունների իրականացում՝ ՀՀ այն ուղղություններով, որոնք կարող են Ադրբեջանի համար մարտավարական եւ ռազմավարական գերակայության տեսանկյունից կարեւոր հանգրվան դառնալ։ Հատկապես վերջին շրջանում քննարկվող Տավուշի գյուղերի հետ կապված բավական ցավալի դիսկուրսը եւ Ադրբեջանում դրա ակտիվացումն ունի հետեւյալ նպատակը՝ Ադրբեջանի կողմից կա հաշվարկ 4+4 բանաձեւով։ Այսինքն՝ Ադրբեջանին սահմանակից 4 գյուղերի եւ այսպես կոչված անկլավների հանձնումը, որոնցից մեկն Արարատի մարզի Տիգրանաշեն գյուղն է, ՀՀ համար բավական խոցելի իրավիճակ են ստեղծում առաջին հերթին անվտանգության տեսակետից, որովհետեւ պաշտպանություն կազմակերպելն այդ ուղղություններով դառնալու է բավական ծանր։ Դեռ չեմ խոսում ենթակառուցվածքային բավական խոշոր խնդիրների մասին»։

Տիգրան Աբրահամյանը հավելեց, որ ադրբեջանական կրակոցները նաեւ ՀՀ բնակչությանն ահաբեկելու նպատակ ունեն․ «Իրենց համար պարզ է դարձել, որ սահմանամերձ բնակավայրերում մարդիկ որեւէ ձեւով պատրաստ չեն իրենց հողերը, պատմական տարածքները հանձնել թշնամուն։ Եվ ըստ էության Ադրբեջանը սրանով նաեւ որոշակի աջակցություն է տրամադրում Հայաստանի իշխանություններին, որպեսզի այդ ահաբեկման մթնոլորտն ավելի շիկացվի։ Նիկոլ Փաշինյանն էլ էր այդ մասին խոսում, որ եթե այդ հողերը չտանք, պատերազմ է սկսվելու։ Այսինքն՝ այս սպառնալիքի իրավիճակն Ադրբեջանն այս մեթոդով փորձում է թեժացնել»։