Վարպետաց դաս. արցախյան համ ու հոտ

2024թ. ապրիլից «Դիզակ Արտ» ՄՀԿ-ն մեկնարկում է «Համի վարպետաց դաս (Master class of Taste)» ծրագիրը։

Ծրագրի նպատակն է՝ հանրահռչակել Արցախից տեղահանված տնայնագործ կանանց աշխատանքները՝ ներգրավելով հասարակության տարբեր շրջանակների, այդ թվում՝ ռեստորանային, սննդի արտադրության բիզնեսով զբաղվող անձանց եւ կազմակերպություններին։

Ծրագիրն իրականացվում է ԵԽ կողմից տրամադրված դրամաշնորհի միջոցով: «Մեր նպատակն է հնարավորինս թեթևացնել մեր հայրենակիցների սոցիալական բեռը, օգնել նրանց նոր գնորդներ ձեռք բերելու հարցում», -ասում է Դիզակ Արտ-ի համահիմնադիր Երազիկ Հայրիյանը:

Ասկերանի բնակչուհի Ալլա Արզումանյանի սրճարանը դստեր ուսանողական ընկերների մշտական հավաքատեղին էր: Մայրիկը տարբեր տեսակի խոտաբույսերը միքսելով անուշահոտ թեյ էր հյուրասիրում: «Մայրիկ» թեյի անվանումը նվիրված է ծննդավայրում անցկացրած ջերմ հիշողություններին: Մտադիր են լայն տարածել իրենց արտադրանքը:

Շերտավոր խմորից, մեղրից, ընկույզից պատրաստված արցախյան փախլավան ներկայացրեց Ինգա Ղարայանը: Ասում է, որ նոր է սկսել զբաղվել հրուշակեղենի պատրաստմամբ, բայց համը հուշում է` սա սկսնակի ձեռքի գործ չէ, առնվազն` վարպետի: Փոքրիկ թղթե տոպրակներում գեղեցիկ դասավորված մրգային չիպսերը ևս իր ձեռքի գործն են:

Տաթև Ազիզյան