Արա Այվազյան․ ոչ մի Ալմաթայի մասին իմ ժամանակ չի խոսվել

ԱԳ նախկին նախարար Արա Այվազյանն այսօր հրավիրած ասուլիսում ասաց, որ 2020 թվականի 44-օրյա պատերազմից հետո Արցախի վերաբերյալ որեւէ հատուկ փաստաթուղթ չի եղել ԱԳՆ-ում։ «Մեր ժամանակ որեւէ հատուկ փաստաթուղթ չի եղել։ Ինչ եղել է, հետեւյալն է՝ միջազգային դիտորդները, մասնավորապես, ԵԱՀԿ Մինսկի խմբի համանախագահները մեկ անգամ այցելել են տարածաշրջան, եղել է երկու հայտարարություն՝ մեկը 2020 թվականի դեկտեմբերի 3-ին, մյուսը՝ 2021 թվականի ապրիլի 12-ին։ Եվ հակառակ Ադրբեջանի պնդումների, որ Արցախի հարցը փակված է, եւ միջազգային միջնորդները՝ համանախագահները, եւ անհատ երկրները շատ հստակ արձանագրել են, որ ուժի կիրառման միջոցով հարցը չի կարող ունենալ իր վերջնական լուծումը։ Ես որոշ չափով արտահայտել եմ այն մոտեցումները, որոնք համահունչ էին հայկական կողմի մտահոգություններին ու առաջարկներին»,- ասաց Արա Այվազյանը։

Այսօր ՀՀ իշխանությունները, հղում անելով Ալմա-Աթայի հռչակագրին, հայտարարում են, որ Արցախը ճանաչում են Ադրբեջանի մաս։ Հարցին, թե Ալմա-Աթայի հռչակագիրը որտեղի՞ց հայտնվեց, Այվազյանը պատասխանեց․ «Հարցը պետք է հասցեագրեք այսօրվա արտաքին գործերի նախարարությանը եւ կառավարությանը»։ Արա Այվազյանը նշեց, որ իր պաշտոնավարման ժամանակ որեւէ հիշատակում կամ աշխատանքային քննարկում չի եղել այդ փաստաթղթի շուրջ։