Տավուշցիների երեկվա հանդիպումը փոխվարչապետի հետ դրական արդյունք չեն տվել

Տավուշի մարզում Ոսկեպար-Կիրանց ճանապարհը շարունակում է փակ մնալ։ Երեկ համայնքների ղեկավարները Երեւանում հանդիպում են ունեցել փոխվարչապետ Մհեր Գրիգորյանի հետ։ «Ժողովրդավարական համախմբում» կուսակցության նախագահ Սուրեն Պետրոսյանը լրագրողների հետ զրույցում ասաց, որ երեկվա քննարկումները դրական արդյունք չեն տվել։ «Ասել են, որ որեւիցե բան չի փոխվում, դեռ մի բան էլ ավելի վատ է լինելու, այսինքն՝ ամբողջական հանձնում է տեղի ունենալու՝ փուլային, բայց շատ արագ, օրերի ու շաբաթների ընթացքում։ Շատ կոնկրետ ասել են՝ որեւիցե բան չի փոխվում, եւ դեռ ամեն ինչ շատ վատ է, այդ հանձնումն անկասելի է։ Դա իրենց կարծիքն է, որ անկասելի է, իսկ իրականում անկասելի է, թե ոչ, կապրենք կտեսնենք»,- ասաց Սուրեն Պետրոսյանը։

Նա նշեց, որ քայլեր նախաձեռնվում են, որոնք այժմ չեն ուզում բարձրաձայնել։ Ըստ նրա՝ իշխանությունը փորձում է բոլորին փաստի առաջ կանգնեցնել՝ դրանով զրկելով մարդկանց ինքնակազմակերպվելուց ու գործողություններ անելուց։ «Բայց մի քանի օր սպասեք եւ կտեսնեք՝ ով է ում փաստի առաջ կանգնեցրել։ Փորձել են մարդկանց խաղաղացնել՝ ասելով, որ ամեն ինչ նորմալ է, կգանք կքննարկենք, եւ միանգամից անցել են գործողությունների։ Բայց ես ասում եմ՝ կապրենք կտեսնենք, թե ով է ում փաստի առաջ կանգնեցրել, իրենք են ամբողջ հայ ազգին կանգնեցրել փաստի առաջ, թե՞ մենք ենք իրենց կանգնեցրել փաստի առաջ»,- հավելեց Սուրեն Պետրոսյանը։