Այս գործընթացները սպառնում են Նոյեմբերյան համայնքի անվտանգությանը

Տավուշի մարզի Նոյեմբերյան համայնքի ղեկավարի տեղակալ Մհեր Աղամյանը բնակչության հետ հանդիպման ժամանակ ասաց, որ կառավարությունում երեկվա հանդիպումից դժգոհ են։ «Երեկ տեղի է ունեցել հանդիպում կառավարությունում՝ փոխվարչապետի գրասենյակում, եւ այն առաջարկությունները, որոնք ներկայացվել են, մենք համարում ենք, որ դրանք սպառնում են Նոյեմբերյան համայնքի անվտանգությանը, լրացուցիչ խնդիրներ են ստեղծում»,- ասաց նա։

«Մենք համարել ենք դա միակողմանի զիջումներ եւ պաշտոնապես հայտարարել ենք, որ այլեւս չենք մասնակցելու այդ բանակցություններին ու գործընթացին։ Եկեք համախմբված լինենք, տիրապետենք մեր էմոցիաներին»,- հայտարարեց Աղամյանը։

Նշենք, որ Նիկոլ Փաշինյանի որոշմամբ՝ սահմանազատման հանձնաժողովին կից աշխատանքային խմբի կազմում պետք է ներգրավվեն նաեւ Տավուշի համայնքապետերը, բայց կառավարությունում երեկ տեղի ունեցած հանդիպումից հետո համայնքապետերը հայտարարել են, որ հրաժարվում են մասնակցել գործընթացին։