Ավելի շատ տարածքներ են հանձնելու․ կիրանցի բնակիչները զենք են պահանջում

Կիրանց

Տավուշի մարզի Կիրանց գյուղ բնակիչները տեղեկացվել են, որ ավելի մեծ տարածքներ են հանձնվելու Ադրբեջանին, քան ավելի վաղ նրանց ներկայացրել էր Նիկոլ Փաշինյանը։ Կիրանցի բնակիչներից մեկի խոսքով՝ «իրենք ներկայացնում էին մեկ այլ սահման, բայց փաստորեն իրենց գծած սահմանը պետք է գյուղի ներքեւի հատվածով անցնի։ Հիմա ստացվում է, որ իրենց ներկայացրած սահմանից ավելի մեծ սահմաններ են ընդգրկվելու, ըստ իրենց, որպես Ադրբեջանի տարածք»։

Գյուղացիներն այսօր դարձյալ հավաքվել ու իրենց բողոքն են նեկայացնում։ Նրանք ասացին, որ որեւէ քաղաքական ուժի չեն սպասարկում, ինքնաբուխ դուրս են եկել փողոց՝ դժգոհություն հայտնելու կառավարությանը։ Նրանք հարցադրում են անում՝ մինչեւ երբ պետք է հայկական հողերը հանձնվեն թշնամուն․ «Թող զենք տան, մենք պայաքարում ենք, մեր հողը պահում ենք։ Կիրանցն անպարտելի է, իր պատմության ընթացքում Կիրանցը երբեւէ չի պարտվել, ուսումնասիրեք մեր գյուղի պատմությունը, թե քանի արշավանք է եղել։ Հիմա մեզ ստիպում են, ասում են՝ պետք է հետ քաշվեք, ինչո՞ւ հետ քաշվենք, հանուն ինչի՞»։

Հիշեցնենք, որ Տավուշի մարզի համայնքապետերը կառավարությունում տեղի ունեցած հանդիպումից հետո նույնպես ասել էին, որ ավելի շատ տարածքներ են հանձնվելու թշնամուն, քան ավելի վաղ ներկայացրել էր Նիկոլ Փաշինյանը։