Ինչի մասին է խոսել Բլինքենը Փաշինյանի և Ալիևի հետ. անհավասար փոխանակում

Միացյալ Նահանգների պետքարտուղարն այսօր առանձին հեռախոսազրույցներ է ունեցել Հայաստանի ու Ադրբեջանի ղեկավարների հետ։

«Էնթոնի Բլինքենը նախ վերահաստատել է ԱՄՆ աջակցությունը Հայաստանի և Ադրբեջանի միջև կայուն և արժանապատիվ խաղաղության պայմանագրի ուղղությամբ առաջընթացին», – ասված է Պետքարտուղարության խոսնակ Մեթյու Միլլերի հայտարարության մեջ։

Վարչապետ Փաշինյանի հետ զրույցում նա ողջունել է Ալմա-Աթայի հռչակագիրը որպես սահմանազատման հիմք օգտագործելու Հայաստանի և Ադրբեջանի համաձայնությունը, որի մասին հաղորդվեց ապրիլի 19-ին։ Ըստ այդմ, կողմերը «նախնական համաձայնեցրել են»՝ Տավուշ-Ղազախ սահմանի որոշ հատվածներ համապատասխանեցնել «Խորհրդային Միության փլուզման պահի դրությամբ գոյություն ունեցող միջհանրապետական սահմանին»։

Նիկոլ Փաշինյանի հետ զրուցելիս Էնթոնի Բլինքենը նաև ընդգծել է Հայաստանի ինքնիշխանությանն ու տարածքային ամբողջականությանը, ինչպես նաև Հայաստանի բարգավաճ, ժողովրդավարական և անկախ ապագայի վերաբերյալ վարչապետ Փաշինյանի տեսլականին աջակցելու Նահանգների շարունակվող ջանքերը։

Պետքարտուղարության փոխանցմամբ՝ Ադրբեջանի նախագահի հետ զրույցում Բլինքենը երախտագիտություն է հայտնել Ալիևին կողմերի միջև սահմանազատման հայտարարության համար, ընդգծել է դրա կարևորությունը և՛ Երևանի, և՛ Բաքվի համար՝ կայուն և արժանապատիվ խաղաղության հասնելու գործում:

Պետքարտուղարը Ադրբեջանի նախագահին կոչ է արել պահպանել երկխոսությունը հայ գործընկերոջ հետ։ Իլհամ Ալիևն ասել է, որ սահմանազատման գործընթացից հետո երկու երկրների սահմանին սահմանագծման աշխատանքների մեկնարկը դրական քայլ էր։

Պետքարտուղարության ղեկավարն ընդգծել է Վաշինգտոնի հանձնառությունը Միացյալ Նահանգների և Ադրբեջանի միջև ամուր երկկողմ հարաբերություններին՝ նշելով էներգետիկայի, կլիմայի և հաղորդակցության ոլորտներում համագործակցելու ջանքերը, ինչպես նաև Բաքվում COP 29-ի հաջողությունը ապահովելու համար:

Նա ողջունել է Ադրբեջանի իշխանությունների կողմից ընդդիմադիր Գուբաթ Իբադօղլուի տնային կալանքից ազատ արձակումը եւ կոչ արել նրան լիովին ու շուտափույթ ազատ արձակել։ Բլինքենը կրկին կոչ է արել Բաքվին պահպանել իր միջազգային և մարդու իրավունքների պարտավորությունները և ազատ արձակել Ադրբեջանում անարդարացիորեն պահվող ձերբակալվածներին։

Բլինքենը կոչ է արել Ադրբեջանին և Հայաստանին շարունակել համագործակցությունը՝ վերահաստատելով ԱՄՆ-ի պատրաստակամությունն աջակցելու այդ ջանքերին։

Դատելով նրանից, թե ինչ է ասել Բլինքենը Փաշինյանին և Ալիևին, «տարածքային ամբողջականությունից դուրս» հայկական հողերը հանձնումը «փոխանակվում» է Ալիևի կողմից տնային կալանքից իր ընդդիմախոսի ազատման հետ։ Նաեւ Ալիեւը համաձայնվում է հրավիրել Փաշինյանին տարեվերջին Բաքվի COP 29 գագաթնաժողովին, ինչը կնշանակի, որ գործընթացն ընթանում է ԱՄՆ-ի հովանու ներքո։ Հնարավոր է, ինչպես գրում են Բաքվի լրատվամիջոցները, Ռուբեն Վարդանյանին էլ ազատ արձակեն։ Հայաստանի սահմանային անորոշ գծում «սյուներ» տեղադրելու շտապողականությունը, ըստ ամենայնի, կապված է այս գործարքի հետ։

Ալմա-Աթայի հռչակագրի նկատմամբ նման կրքոտ վերաբերմունքի համար Բլինքենին հավանաբար կպարգեւատրվեն ԱՊՀ մեդալով։