«Պուտինի վստահված անձինք». Ալիևին կարելի է

Եվրահանձնաժողովի նախագահ Ուրսուլա ֆոն դեր Լեյենը բացառել է Ռուսաստանի նախագահ Վլադիմիր Պուտինի «վստահված անձանց» հետ համագործակցության հնարավորությունը։ Պուտինի «մարդիկ» փորձում են «ոչնչացնել» ԵՄ-ն ներսից՝ ապատեղեկատվության և բևեռացման միջոցով, երկուշաբթի օրը Մաաստրիխտում կայացած միջոցառման ժամանակ ասաց ֆոն դեր Լեյենը։

Նա նշեց Ռուսաստանի հետ կապերի մասին մեղադրանքները, որոնք ներկայացվել են Եվրախորհրդարանում AfD-ի գլխավոր թեկնածու Մաքսիմիլիան Կրահի և AfD-ի պատգամավոր Պետր Բիստրոնի դեմ:

Ֆրաու ֆոն դեր Լեյենը Ալիևին չի հիշատակել «Պուտինի ընկերների» շարքում, թեկուզ ապրիլի 22-ին հենց Ալիեւն է այցելել Մոսկվա և հաստատել Ռուսաստանի հետ համագործակցությունն ու ապագա ծրագրերը։ Նա չնշեց, որ Ալիևը Պուտինի հետ հանդիպումից հետո ուժեղացրել է ճնշումը Հայաստանի վրա՝ պահանջելով արտատարածքային միջանցք «Ռուսաստանի ԱԴԾ-ի վերահսկողության ներքո»։ Նա նաև չմեկնաբանեց այն տեղեկությունը, որ Ռուսաստանը Բաքվիմիջոցով արգելված վառելիք է մատակարարում Եվրոպա։ Իսկ այն, որ Ռուսաստանն ու Ադրբեջանը ռազմավարական համագործակցության համաձայնագիր են ստորագրել Ուկրաինա Ռուսաստանի ներխուժումից բառացիորեն մեկ օր առաջ, բոլորովին չի հիշվում։

Բաքվի ընդդիմադիր Արիֆ Յունուսովը, ի պատասխան ուկրաինացի լրագրողի կշտամբանքին, թե Ադրբեջանը եղբայրանում է Ռուսաստանի հետ, պատասխանել է՝ լավ է անում, ձեզ ի՞նչ։ Ադրբեջանը, ըստ Յունուսովի, կշարունակի սերտ հարաբերությունները Ռուսաստանի Դաշնության հետ, քանի որ հենց նա օգնեց գրավել Ղարաբաղը և մաքրել այն հայերից։

Եվրամիությունը, ըստ երևույթին, քարտ-բլանշ է տվել Ալիևին՝ դառնալու Պուտինի «վստահելի անձը» ոչ միայն Հայաստանի վերացման քաղաքականության համատեքստում, այլ նաև Իրանի հետ կարևոր հարևանության հետ կապված։ Ալիեւին կարելի է, նա ավելի հասկանալի է։