Հին ու բարի “Լուսարար”․ “դասատվոցը” թերթը հիմա Երեւանում

«Լուսարար» թերթը Արցախի կրթության նախարարության պաշտոնական թերթն է: Այն ժողովրդի մեջ հայտնի է որպես «դասատվոցը թերթ»:

Լուսարարը առաջին անգամ լույս է տեսել 1999 թ., սկզբում ամենամսյա էր, իսկ հետո ամենշաբաթյա: Թերթը պարտադիր էր բոլոր դպրոցների համար: Այնտեղ լուսաբանվում էր Արցախի կրթական կյանքը, օլիմպիադաների և ստուգումների արդյունքները: Այն տրամադրվում էր ըստ ներկայացված հայտերի, բայց որպես կանոն բոլորը հայտագրվում էին, օրինակ` Հադրութի շրջանի Մարիամաձոր համայնքի դպրոցի հայտագրված թերթերի քանակը 18 էր:

Թերթը լույս էր տեսնում Ստեփանակերտում ու հասնում Արցախի բոլոր շրջանների դպրոցներ:

Հետպատերազմյան դժվար ժամանակահատվածում և համացանցի անհասանելիության պարագայում «Լուսարարը» կրթական ոլորտի գլխավոր տեղեկատուն էր և բոլոր դպրոցները անհամբեր սպասում էին թերթին, նամանավանդ, եթե այդ համարում պետք է գրեին իրենց դպրոցի մասին:

Այս տարվա մայիսի 18-ին Հ.Թումանյանի թանգարանում փոքր դարակի վրա տեսանք «Լուսարար» թերթի մի քանի օրինակ, որոնցից մեկը բաժին հասավ նաև մեզ, որպես «դասատվոց ընտանիք»:

Լուսարարը 24 տարի Ստեփանակերտում տպվելուց հոտո այս տարի առաջին անգամ հրապարակվել է Երևանում, բարեգործական հիմունքներով, մեր ընտանիքի ուսուցիչները եւս նկատել են , որ «Լուսարարը» մնում է որպես հին ու բարի թերթ:

Այս անգամ «Լուսարարը» բովանդակությամբ ոչ այդքան կրթության, դպրոցների մասին էր, այլ հիշողությունների, հարազատ գյուղերի, կարոտի:

Քրիստինե Ալավերդյան