Հայաստանը չի ճանաչում Պաղեստինը․ ինչի՞ համար է Սիմոնյանը ուղեվորվում Սլովենիա

Գազա

ԱԺ նախագահ Ալեն Սիմոնյանի գլխավորությամբ հունիսի 3-6-ը ԱԺ պատվիրակությունը կգործուղվի Լյուբլյանա՝ Սլովենիայի Հանրապետություն:

Հիշեցնենք, որ երեկ Սլովենիայի կառավարությունը ճանաչեց Պաղեստինի պետության անկախությունն ու ինքնիշխանությունը: Որոշումը վերջնական պետք է հաստատի Սլովենիայի խորհրդարանը, ակնկալվում է, որ դա տեղի կունենա հունիսի 4-ին։

Անցած օրերին Պաղեստին պետության ճանաչման մասին հայտարարել են ևս երեք եվրոպական երկրներ՝ Նորվեգիան, Իսպանիան և Իռլանդիան։ Իսրայելն ի պատասխան հետ է կանչել իր դեսպաններին Օսլոյից, Դուբլինից և Մադրիդից։

2024 թվականի դրությամբ Պաղեստին պետության անկախությունը ճանաչել են Միավորված ազգերի կազմակերպության (ՄԱԿ) անդամ 145 երկրներ՝ 193-ից։ Բացի այդ, Պաղեստինը 2012 թվականի նոյեմբերից ՄԱԿ-ում դիտորդ երկիր է։

Հայաստանը այն 50-ից էլ քիչ երկրների շարքում է, որոնք չեն ճանաչել Պաղեստինը։

Արդյո՞ք դա կապված է Հայաստանի եւ Իսրայելի հատուկ “քիմիայի” հետ, որն այս վերջին 6 տարիներին առավել ակնհայտ է դարձել։ Չնայած բազմաթիվ այն պնդումներին, որ Հայաստանի դեմ 2020-2023 թ․ պատերազմի շահառուներից գլխավորը հենց Իսրայելն է, Հայաստանը ոչ մի քայլ չարեց այդ երկիրը պատասխանատվության հրավիրելու համար։ Հիմա էլ չի ճանաչում Պաղեստինը։

Դժվար թե հայ պատգամավորները Սլովենիա են գնում, որ իրենց զորակցությունը հայտնեն Պաղեստինը ճանաչելու որոշմանը։