Բաքուն այժմ թիրախավորել է «Մենք ենք մեր սարերը» հուշարձանը. «նրանց պետք էր “գնդակահարել” պատերազմի ժամանակ»

Բաքվում քննարկումներ են սկսվել օկուպացված Ստեփանակերտում «Մենք ենք մեր սարերը» հուշարձանի պահպանման նպատակահարմարության շուրջ։ Շատերը հանգում են այն մտքին, որ ավելի լավ կլինի քանդել հուշարձանը։

Պատգամավոր Նասիրովն ասում է, որ հուշարձանի ապամոնտաժումը սկզբունքային հարց է. «Բանն այն է, որ հայկական անջատողականության բոլոր նշանները պետք է քանդվեն, և դրանցից հետք չմնա»։

Նրանք հուշարձանը համարում են «հայկական ինքնության ցուցիչ»։

Սպիտակ կուսակցության նախագահ Տ.Աբբասլիի խոսքերով, Բաքուն «միջազգային ճնշման տակ կլինի, և մեզ կանվանեն պատմական հուշարձաններ ոչնչացնող վանդալներ։ Բայց եթե ոչ հիմա, ապա որոշակի ժամանակ անց այս հուշարձանը պետք է քանդվի, որպեսզի հետո հայերը կեղծ պատմություն չստեղծեն։ Ընդհանրապես, նա պետք է “պատահաբար գնդակահարվեր” պատերազմի ժամանակ։ Բայց մենք այդքան խորամանկ չէինք»:

Մարդիկ, ովքեր չգիտեն, թե որտեղ են թաղված իրենց պապերն ու տատերը, ցանկանում են արմատախիլ անել մի ամբողջ ժողովրդի արմատները, որոնք հազարավոր տարիներ ապրել են այս հողի վրա: