Իսրայելը պատրաստ է դադարեցնել պատերազմը 42 օրով
- 12:41 04.06.2024
Իսրայելի վարչապետ Բենիամին Նեթանյահուն հայտարարել է, որ իր երկրի բանակը կարող է 42 օրով դադարեցնել պատերազմը պաղեստինյան ՀԱՄԱՍ ահաբեկչական կազմակերպության հետ, հայտնում է i24 հեռուստաալիքը։
Բացի այդ, Իսրայելի կառավարության ղեկավարը նշել է զինադադարի պայմանները և նշել պատճառները, թե ինչու այս պահին Գազայում պատերազմը չի կարող ամբողջությամբ դադարեցվել։
«Պատանդների վերադարձի համար մենք կարող ենք պատերազմը դադարեցնել 42 օրով։ Բայց մենք չենք կարող կանգնեցնել պատերազմը։ Իրանցիները և մեր բոլոր թշնամիները մեզ հետևում են, ուզում են տեսնել՝ մենք հանձնվու՞մ ենք»,- շեշտեց նա։ Նեթանյահուն նաև ասել է, որ ցամաքային գործողությունը Գազայի հատվածում, որտեղ, ինչպես հայտնի է, անցյալ հոկտեմբերին պաղեստինցի գրոհայինները ներխուժել են Իսրայել, չի ավարտվի այնքան ժամանակ, քանի դեռ Երուսաղեմը չի հասել իր բոլոր նպատակներին։
«Պատերազմը չի ավարտվի, քանի դեռ չենք հասել մեր բոլոր նպատակներին։ Մենք չենք հրաժարվի բացարձակ հաղթանակից»,- հավելել է Իսրայելի վարչապետը։ Բացի այդ, Նեթանյահուն ևս մեկ անգամ նշել է Իսրայելի պաշտպանության բանակի ցամաքային գործողության հիմնական նպատակները՝ պաղեստինցի գրոհայինների կողմից գերեվարված բոլոր պատանդների ազատ արձակումը, ինչպես նաև ՀԱՄԱՍ ահաբեկչական կազմակերպության ոչնչացումը։
Հիշեցնենք, որ ԱՄՆ-ը դադարեցրել էր Իսրայելին տրամադրվող ռազմական օգնությունը Գազայի հարավում իսրայելական բանակի գործողության պատճառով:
Հաղորդվել է, որ Իսրայելի պաշտպանության բանակի տանկերը մտել են Ռաֆահ և գրեթե հասել Եգիպտոսի հետ սահմաններին։
Ավելի ուշ հայտնի դարձավ, որ Իսրայելը համաձայնել է Գազայի հատվածում պատերազմին վերջ տալու Բայդենի ծրագրին։