Ալեն Սիմոնյանը Սլովենիայում. Հայաստանը նույնպես ճանաչել է Արցախը, բայց որպես այլ պետության մաս

Սլովենիայի խորհրդարանը Պաղեստինը ճանաչել է որպես անկախ պետություն։ Երեքշաբթի օրը՝ հունիսի 4-ին, քվեարկությանը ներկա 53 պատգամավորներից 52-ը քվեարկեցին այս որոշման օգտին։ Սլովենիան այսպիսով հաջորդում է Նորվեգիային, Իսպանիային և Իռլանդիային, որոնք մայիսի վերջին պաշտոնապես ճանաչեցին Պաղեստինի անկախ պետությունը։

Սլովենիայի կառավարության ղեկավար Ռոբերտ Գոլոբը Պաղեստինի պետականության ճանաչումն անվանել է «հույսի փարոս Պաղեստինի ժողովրդի համար Հորդանան գետի Արևմտյան ափին և Գազայի հատվածում»:

Նույն օրը Սլովենիայում էր գտնվում Հայաստանի Ազգային ժողովի նախագահ Ալեն Սիմոնյանի գլխավորած պատվիրակությունը։ Սլովենիայի փոխվարչապետ և արտաքին գործերի նախարար Տանյա Ֆայոնը հանդիպմանը նշել է. «Մենք տեսնում ենք Հայաստանի կառուցողական մոտեցումը Հարավային Կովկասում խաղաղություն հաստատելու հարցում»։

Հայաստանի «կառուցողականության» վրա ծիծաղում են ոչ միայն Սլովենիայում, այլ նաև այլ երկրներում՝ մատնացույց անելով ազգային իրավունքներից ու Արցախից հրաժարված հայկական իշխանություններին։ Ալեն Սիմոնյանը, լսելով Սլովենիայի կողմից Պաղեստինի պետականության ճանաչման մասին, ասած կլինի, որ Հայաստանը նույնպես ճանաչել է Արցախը… որպես ադրբեջանի մաս, իսկ Արցախի պետական ​​մարմինները Հայաստանը համարում են ազգային անվտանգության սպառնալիք։