Շրջափակված ամուսնություններ
- 17:25 05.06.2024
«Շրջափակված ամուսնություններ» նախագիծը պատմում է Արցախում շրջափակման ընթացքում ընտանիք կազմած զույգերի մասին՝ սուղ պայմաններում կյանքի կարևոր որոշում կայացնելուց մինչև հարսանեկան արարողության կազմակերպում։
Կարմենն ու Լուիզան իրենց հարսանիքի օրը հստակեցրել էին վաղուց և որոշել, որ չեն փոխելու այն՝ անկախ ամեն ինչից։ Ամուսնության օրը չփոխվեց, ինչպես Լուիզան է նշում, փոխարենը կազմակերպվեց համեստ ու հիշարժան արարողություն։ Լուիզան պատմում է օրվա խորհրդի ու շրջափակման ընթացքում ամուսնանալու մասին ։
Ասպրամն ու Էդուարդն ամուսնացել են շրջափակման առաջին օրերին։ Նախապես պլանավորած 200 հոգանոց հարսանիքը կազմակերպվեց 20 հոգով։ Զույգի համար կարևորն Աստծո օրհնությամբ ամուր ընտանիք ստեղծելն էր, իսկ ճոխ ու մեծ հարսանիք չունենալը նրանց համար տխրելու և հուսահատվելու առիթ չդարձավ։
Ասպրամը պատմում է, որ միշտ երազել է ունենալ տարբերվող հարսանիք, դուրս գալ ավանդական հարսնացուի կերպարից ու այդ օրը ներկայանալ կարմիր շրթներկով․ այսօր կես կատակ – կես լուրջ ասում է, որ իրենց հարսանիքը երկար է հիշվելու։
Ալյոնայի և Տիգրանի ամուսնությունը Արցախում վերջիններից էր: Ալյոնայի կարծիքով ամենադժվար ու պատասխանատու ժամանակաշրջանն էր ամուսնություն պլանավորելու և կազմակերպելու համար։ Օգոստոս ամսին Արցախում կարելի էր գտնել միայն ձմերուկ, լոլիկ, վարունգ և մի կյանք հույս ու հավատ առ այն, որ հնարավոր է ընտանիքներ կազմելով պայքարել ու հաղթահարել դժվարությունները։
Հեղինակներ՝
Մարտա Հարությունյան
Քրիստինե Ղահրամանյան
Նյութը պատրաստված է Եվրոպական Միության ֆինանսական աջակցությամբ։
Այս հրապարակման բովանդակությունը բացառապես հեղինակի պատասխանատվությունն է, և այն չի կարող ընկալվել որպես Եվրոպական միության տեսակետների արտացոլում: