Փաշինյանը վիրավորեց արցախցիներին ու չասաց, թե ի՞նչ “ձեւ” էր առաջարկում

Ազգային ժողով-կառավարություն հարց ու պատասխանի ժամանակ Նիկոլ Փաշինյանն ընդդիմությանը մեղադրեց Արցախի հայաթափման ու արցախցիներին բողոքի ակցիաների հանելու համար։

«Լեռնային Ղարաբաղի մեր գործընկերներն ինձ մեղադրում էին նրա համար, որ ես իբր սահմանը փակել եմ, որ ԼՂ ժողովուրդը Լեռնային Ղարաբաղից դուրս չգա։ Դուք եւ ձեր կողմից նշանակաված իշխանությունը դատարկեց Լեռնային Ղարաբաղը։ Բա որտե՞ղ էին կարգավիճակ ստանալու։ Ասում էի՝ լսեք, դուք հասկանո՞ւմ եք՝ ինչ եք ուզում հիմա անեք՝ դուրս գանք, դուրս գանք։ Բա որ ինձ պատին էիք դեմ տալիս, ասում էիք՝ ես չեմ թողնում, որ ԼՂ ժողովուրդը դուրս գա, բա ԼՂ ժողովուրդը, որ դուրս եկավ, այդ կարգավիիճակը որտե՞ղ էր ստանալու։ Մենք իրենց ասել էինք ձեւը, ինչ պետք է անել՝ այդ խնդրի լուծմանը հասնելու համար։ Դուք էիք, որ այս ամբիոններից ասում էիք եւ մի հատ էլ զանգում էիք այնտեղ, ասում էիք՝ չանեք դա, կանեք ուղիղ հակառակը, վեր կացեք, բոլորով եկեք։ Գիտե՞ք՝ ինչու էիք կանչում, որովհետեւ դուք թքած ունեք ԼՂ ճակատագրի վրա։ Քանի որ ցույց էիք անում այստեղ, 3-4 հազար մարդուց ավելի չէր հավաքվում, ձեզ ցույցի մասնակից էր պետք։ ԼՂ ժողովրդին էնքան թունավորեք Հայաստանի կառավարության ու Հայաստանի ժողովրդի դեմ․․․ Ձեզ ԼՂ ժողովուրդը 1998 թվականից հետո պետք է եղել ձեր իշխանությունը պահելու համար։ Այսօր իրենց բերել եք՝ որպես ցույցի մատերիալ՝ 5000 դրամով ցույցերի բերելու համար։ Այ էս եք դուք, հիմա էլ ուզում եք նույնը անեք ՀՀ ժողովրդի հետ, որ գուբերնիայում լիենք թեմական առաջնորդներ՝ կայսեր տիրապետության ներքո։ Ձեզ համար ԼՂ ժողովուրդը եղել է, կա եւ կլինի իշխանություն պահելու միջոց»,- հայտարարեց Փաշինյանը։

Փաշինյանը չասաց, թե ի՞նչ “ձեւ” էր առաջարկում․ արցախցիները մնան Արցախում եւ ցեղասպանությա՞ն ենթարվեն, որ 5-հազարանոց մատերիալ չդառնան, թե՞ մնան, որ Ալիեւն ու Պուտինը հաճույք ստանան։