Freedom House-ի զեկույցից հետո Բաքուն մեղադրել է ԱՄՆ-ին հայամետ կողմնակալության մեջ
- 21:19 03.07.2024
Օրերս հրապարակվել է Փաստհավաք առաքելության զեկույցը, որը պատրաստվել է ԱՄՆ Պետդեպարտամենտի կողմից։ Անցյալ նոյեմբերին Կոնգրեսի լսումների ժամանակ պետքարտուղարի օգնական Ջեյմս Օ’Բրայենը հայտարարեց այս փաստաթուղթը, և զեկույցը հրապարակվեց տարածաշրջան կատարած նրա վերջին այցից անմիջապես հետո: Հարավային Կովկասի հետազոտությունների ադրբեջանական կենտրոնի վերլուծաբանները զեկույցն անվանել են «երկակի ստանդարտների եւս մեկ և նույնիսկ ավելի կեղտոտ օրինակ»:
Ասված է, որ փաստաթուղթը միակողմանիորեն և լուրջ աղավաղումներով ընդգրկում է 30-ամյա հակամարտության միայն վերջին երեք տարիները, «ղարաբաղցի հայերի կամավոր և խաղաղ գաղթը ողջ աշխարհի աչքի առաջ որակվում է որպես էթնիկ զտում»։ Զեկույցում նշվում է, որ անցյալ տարվա սեպտեմբերին մեկօրյա հակաահաբեկչական գործողությունների արդյունքում ղարաբաղցի հայերից զոհվել է 229 մարդ, և նրանցից միայն 34-ն են խաղաղ բնակիչներ։ «Փաստաթղթում կեղծավորության գագաթնակետը Ադրբեջանին մարդկության դեմ գործողությունների և պատերազմական հանցագործությունների մեղադրանքն է՝ հղում կատարելով Միջազգային քրեական դատարանի Հռոմի կանոնադրությանը»։
«Զեկույցի հրապարակումն այս պահին նման կողմնակալ ձևով ամենևին էլ պատահական չէ։ Սա առաջին հերթին պայմանավորված է Միացյալ Նահանգների ներքին օրակարգով»,- ասվում է մեկնաբանության մեջ։ «Ներկայիս վարչակազմը փորձում է հնարավոր համաձայնությունը ներկայացնել որպես արտաքին քաղաքական հաջողություն իր նախընտրական քարոզարշավում։ Բայց Բաքվի՝ Հայաստանի սահմանադրության փոփոխությունների արդարացի պահանջը խախտում է ամերիկյան կառավարության այս ծրագրերը, և նման իրավիճակում Սպիտակ տունը բացահայտ շանտաժի է ենթարկում Ադրբեջանին։ Օ’Բրայենի այցից անմիջապես հետո փաստաթղթի հրապարակումը կապված է սրա հետ»։