Հայոց պատմությունից հատկապես ո՞ր դրվագներն են բացակայելու նոր դասագրքում

«Հայաստանի պատմությունը» պետության գոյության զարգացման պատմությունն է՝ պետության չգոյության դրվագներով, իսկ «Հայոց պատմությունը» պետության չգոյության պատմությունն  է՝ պետության գոյության դրվագներով: Այս մասին այսօր՝ հուլիսի 11-ին, կառավարության նիստում հայտնեց Նիկոլ Փաշինյանը՝ ներկայացնելով «Հայաստանի պատմության» և «Հայոց պատմության» եզրույթների իր ընկալումը։

Նա հայտնեց, թե առանցքային է պետության հարատևության ռազմավարությունը, և պնդեց, թե իր ներկայացրած ընկալումն արդեն ընդունվում է հասարակության շրջանում։

Նա բերեց օրինակ՝ նշելով. «Ինձ համար էլ անսպասելի, բայց ՀՀ քաղաքացիների ռեակցիան Կիրանցի հատվածում սահմանային սարքավորումների պատկերներին, հենց դրա ամենավառ ապացույցն է և այն «պետության» և «չպետության» պատկերացումներն արտահայտող պատկերներ են և սրա նկատմամբ հանրային վերաբերմունքն այս ամպլիտուդի մեջ է»։

Փաշինյանը հայտարարեց, թե պետք է ապահովեն տրանսֆորմացիան Էմոցիաների ժողովրդից դեպի պետության ժողովուրդ։

Փաշինյանն այդպես էլ չբացատրեց, թե Հայոց պատմությունից հատկապես ո՞ր դրվագներն են բացակայելու նոր դասագրքում։ Օրինակ, ինչպե՞ս է ներկայացվելու ԽՍՀՄ քանդման եւ ՀՀ կազմավորման գործընթացը, որը սկիզբ է առել Արցախյան շարժումով եւ հայ ժողովրդի՝  1989 թ․ դեկտեմբերի 1-ի Արցախի եւ Հայաստանի վերամիավորման մասին ինքնիշխան որոշումով։ Դրանից հետո ինքնիշխան ոչ մի որոշում չի կայացվել։ 

Հայաստանի պատմությունը հայոց պատմությանը հակադրելը նույնն է, ինչ սրտանոթային համակարգը հակադրես ամբողջական օրգանիզմին՝ նույնիսկ եթե երիկամը համաձայն է։