ՄԱԿ-ի դատարանն անօրինական է ճանաչել Իսրայելի կողմից պաղեստինյան տարածքների օկուպացումը
- 09:06 20.07.2024
Արդարադատության միջազգային դատարանը եզրակացրել է, որ Իսրայելի կողմից պաղեստինյան տարածքների օկուպացիան խախտում է միջազգային իրավունքը։
Դատարանը որոշել է, որ Իսրայելը պետք է դադարեցնի բնակավայրերի գործունեությունը օկուպացված Արևմտյան ափին և Արևելյան Երուսաղեմում և որքան հնարավոր է շուտ վերջ դնի այդ տարածքների և Գազայի հատվածի «ապօրինի» օկուպացիային։
Դատարանի խորհրդատվական եզրակացությունը պարտադիր չէ, սակայն դրա քաղաքականության նշանակությունը նշանակալի է: Արդարադատության միջազգային դատարանն առաջին անգամ արտահայտեց իր դիրքորոշումը 57-ամյա օկուպացիայի օրինականության վերաբերյալ։
Նիդեռլանդների Հաագայում նստած դատարանը ՄԱԿ-ի Գլխավոր ասամբլեայի պահանջով անցած տարվա սկզբից ուսումնասիրում է հարցը։
Դատարանին մասնավորապես խնդրեցին արտահայտել իր տեսակետը պաղեստինցիների նկատմամբ Իսրայելի քաղաքականության և գործելակերպի, ինչպես նաև օկուպացիայի իրավական կարգավիճակի վերաբերյալ:
Վերջնական որոշման մեջ, որը հրապարակել է դատարանի նախագահ Նաուաֆ Սալամը, ասվում է, որ «Իսրայելի շարունակական ներկայությունը օկուպացված պաղեստինյան տարածքում անօրինական է»։
«Դատարանը գտնում է, որ Իսրայել պետությունը պարտավոր է փոխհատուցում վճարել օկուպացված պաղեստինյան տարածքներում ֆիզիկական անձանց և կազմակերպություններին պատճառված վնասի համար», – ասել է Սալամը Հաագայում կայացած դատական նիստում:
Իսրայելի վարչապետ Բենիամին Նաթանյահուն մերժել է ՄԱԿ-ի միջազգային դատարանի եզրակացությունը, որը պահանջում է պաղեստինյան տարածքներում դադարեցնել բնակեցման գործունեությունը ։
«Հրեա ժողովուրդը չի նվաճում իր երկիրը՝ ոչ մեր հավերժական մայրաքաղաք Երուսաղեմը, ոչ էլ մեր նախնիների ժառանգությունը Հրեաստանում և Սամարիայում (Արևմտյան ափի իսրայելական անվանումը): Հաագայի ոչ մի կեղծ որոշում չի խեղաթյուրի այս պատմական ճշմարտությունը։ Մեր հայրենիքի ողջ տարածքում իսրայելական բնակավայրերի օրինականությունը չի կարող կասկածի տակ դրվել»,- գրել է նա X-ում: