Մերձավոր Արևելքում էսկալացիայի սպառնալիքը հասել է «կարմիր կետին»
- 21:41 03.08.2024
ԱՄՆ-ի և Մեծ Բրիտանիայի քաղաքացիներին կոչ է արվել հեռանալ Լիբանանից, քանի դեռ հասանելի են կոմերցիոն թռիչքները: Նմանատիպ հայտարարություններ են արել Ռուսաստանի, Բելգիայի, Շվեդիայի և այլ երկրների իշխանությունները։ Իսրայելը խոստացել է պատասխան տալ Հեզբոլլահին Գոլանի վրա հրթիռային հարձակման համար։
Նախկինում Բելգիայի, Նորվեգիայի, Ֆրանսիայի, Լատվիայի, Ուկրաինայի, Ադրբեջանի, Հնդկաստանի, Գերմանիայի և Ղազախստանի իշխանությունները խորհուրդ էին տվել ձեռնպահ մնալ Լիբանան մեկնելուց։
Ուրբաթ երեկոյան Պենտագոնը հայտարարեց, որ Մերձավոր Արևելքում աճող լարվածության ֆոնին ԱՄՆ հրամանատարությունը որոշել է մոտակայքում լրացուցիչ տեղակայել մի քանի ռազմանավեր և կործանիչներ։
ԱՄՆ ռազմածովային ուժերի ավիակիր հարվածային խումբը (ACG)՝ Աբրահամ Լինքոլն նավի գլխավորությամբ, ուղարկվել է Միջերկրական ծով «ամերիկյան կոնտինգենտին և Իսրայելին պաշտպանելու համար»։
Բացի բուն ավիակիրից, հարվածային խումբը սովորաբար ներառում է առնվազն մեկ հածանավ, մի զույգ կործանիչներ և ուղեկցող նավեր: Մեկ AUG-ի անձնակազմը կազմում է մոտ 7500 մարդ։
Տարածաշրջանում ԱՄՆ-ի ռազմական ներկայությունն ուժեղացնելու որոշումը կայացվել է այն բանից հետո, երբ Իրանը և նրա դաշնակիցները Իսրայելին խոստացան «անխուսափելի հատուցում»՝ չորեքշաբթի օրը Թեհրանում սպանված ՀԱՄԱՍ-ի առաջնորդ Իսմայիլ Հանիեի և Հեզբոլլահի հրամանատար Ֆուադ Շուքրի համար։
Իսրայելի իշխանությունները չեն հաստատում կամ հերքում երկու առաջնորդների սպանության մեղադրանքները։