Երկրաշարժի հետևանքով Երանոսում տներ են վնասվել

Այս գիշեր տեղի ունեցած երկրաշարժի հետևանքով Գեղարքունիքի մարզի Երանոս գյուղում կան վնասված ու փլուզված շինություններ։ Այս մասին NEWS.am-ին պատմեց բնակիչներից մեկը, որի տունը նույնպես երկրաշարժից վնասվել է։

«Շատ ուժեղ էր երկրաշարժը, նույնիսկ ոչ հին տներ կան, որ նոր էին սարքել, վնաս են կրել։ Հիմա հանձնաժողովը վնասի չափն է հաշվում, այցելում տներ»,- ասաց բնակիչը։

Գեղարքունիքի մարզի Երանոս գյուղում գործում է երկրաշարժի հետեւանքները գնահատող հանձնաժողով։ Այս մասին հայտնում է գյուղի վարչական ղեկավար Սաշա Բավեյանը։

Օգոստոսի 12-ին՝ ժամը 02:02-ին, Սեյսմիկ պաշտպանության տարածքային ծառայության սեյսմիկ ցանցը Մարտունի քաղաքից (Գեղարքունիքի մարզ) քաղաքից 9 կմ հյուսիս-արևմուտք՝ Երանոս գյուղի մոտակայքում, գրանցել է 4.2 մագնիտուդով երկրաշարժ։

«Հանձնաժողովը գնահատում է իրավիճակը, կան վնասներ և ավերածություններ։ Հիմնականում ավերվել են տներին կցված հին շինությունները»,- նշեց Բավեյանը։

Ավելի վաղ Գեղարքունիքի մարզպետ Կարեն Սարգսյանը հայկական լրատվամիջոցներին հայտնել էր, որ վնասվել է 50 տուն։